ABI nako og typical superhero movie ra gihapon ang “Shazam” pero lahi siya, ug tingali, usa ni o di man gani pinaka da best superhero movie sa Disney Channel extended universe (DCEU) nga akong nakit-an.
Nindot pagka-develop ang iyang estorya nga nagsugod sa maorag serious drama ngadto sa pagka-comedy ug action-packed film.
Ang 14-anyos nga si Billy Baston (Asher Angel) mahimong adult superpower (Zachary Levi) kon mosinggit siya og “Shazam.” Apan ang iyang pangisip pareho ra gihapon sa batang si Billy mao nga nagkiat lang ang agi.
Mabalik siya sa iyang naandang pagkabata kon mosinggit na sad siya og balik nga “Shazam.”
Sa pagsugod sa pelikula gipakita dihang mga 5-anyos pa lang si Billy dihang nabuwag siya sa iyang mama samtang nanuroy sila sa usa ka carnival.
Adunay nisagup niya nga magtiayon diin niya nahimamat ang laing lima pa ka foster siblings.
Ang kinabuhi sa nahimo niyang mortal nga kaaway nga si Dr. Thaddeus Sivana (Mark Strong) gipakita sad unsay kinabuhi niini sa bata pa.
Daghan og twist ang estorya nga nakahatag og dugang kahinam sa pelikula. Nindot sad siya og visual effects labi na sa ilang fight scenes.
Sa katapusan, gipakita si Dr. Thaddeus nga naa sa bartolina ug maorag dunay gika-estorya. Klaro nga dunay part 2.
Motan-aw gihapon ta `nak? Aw sige basta achiever gihapon ka inig Grade 4 ha! Hehe...
DARNA!
Nakahinumdom ko sa “Darna” nga hangtod karon hanap pa sa diyes panas kon kinsay moda.
Pun-an lang nako ang gisulti ni Lea Salonga nga mas nindot kuno nga morena ug dili mestisa ang moda sa Darna.
Korek! Pero mas lingaw kon kamao sad sa comedy ang mag-Darna ug wa koy laing nahunahunaan nga angayan niini kundi si Sarah Geronimo.
Dili kay fan ko ni Sarah ha pero base sa iyang mga nangaging pelikula ug sa iyang personality perfect gyud siya nga mahimong next Darna!
Pinay na pinay, very reserved, talented ug tried and tested na sad siya sa comedy ug sa drama.
First time sad nga makakita na gyud ta ni Sarah nga magpa-sexy. Daghan kaayo tang `abangan’ kon si Sarah ang mag-Darna. Di ba!?
Karong Huwebes diay atangi ang atong “Sssuper Ka!” kay kuwaresma na man mao nga taga-Sto. Rosario Parish ang atong ka-Q and A.
Kinsa siya? Abangan!!!