NGANO? Kagahapon gisugdan sa Commission on Election (Comelec) ang pagpanangtang sa mga poster sa kandidato nga wala mosubay sa gilagda nga gidak-on kon sukod. Matud pa ni Cebu City South District Election Officer Marchel Sarno nga ang mga empleyado sa Comelec sa siyudad ug kalungsoran moapil sa “Operation Baklas”.
Ang sunod nga pagpanangtang sa mga poster nga sobra sa dos purgadas por tres purgadas ang gidak-on pagahimuon sa Comelec dinuyogan sa Department of Environment and Natural Resources (DENR), Department of Public Works and Highways (DPWH), Bureau of Fire Protection (BFP), Philippine National Police (PNP) ug sa Department of Education (DepEd).
Basi sa Fair Elections Act kutob ra sa two feet by three feet ang gidak-on sa poster o tarpaulin sa mga kandidato. Apan kay ang balaod sa Comelec nag-ingon man nga dili pa ilegal ang mga dagkong poster o tarpaulin samtang di pa opisyal ang panahon sa pangampanya mao nga nag-indigay og padako ang mga kandidato sa ilang poster.
Tan-awa di ba kataw-anan ning maong balaod sa Comelec? Kon gitugtan ang mga kandidato og pabuhat sa dagko kaayo nga poster apan baklason lang unya ig-abot sa opisyal nga panahon sa pangampanya, unsa may imong ikasulti ana? Di ba mao na ang giingon nga kinuwanggol? Susmaryosep!
Kon ang balaod sa piliay naglagda nang daan nga gidili ang mga dagkong poster human mosumitir ang mga kandidato sa ilang sa certificate of candidacy (COC) bisan wala pa ang opisyal nga panahon sa pangampanya unya gamiton ni nga ebidensya batok sa kandidato ang mga dagko kaayo nga poster aron pagdiskwalipay, morag way kandidato nga mopabuhat og dako nga poster.
Hinuon ang mga kandidato dunay gyuy kwarta nga gastuon alang sa ilang kandidatora. Apan kining gibuhat sa mga kandidato nga nagpabuhat og dagko kaayo nga poster mogawas nga nag-usik-usik lang sa ilang pundo kay ig-abot sa opisyal nga panahon sa kampanya tangtangon man lang gihapon sa Comelec.
Kining balaod sa Comelec nga nagdili sa mga dagko nga poster sa mga kandidato sila ra usab ang mahago og panangtang. Gani, matud pa sa mga opisyal sa Comelec, kuwang sila og tawo para sa “Operation Baklas” mao nga nagpatabang sila sa uban ahensya sa kagamhanan.
Ang atong punto ani nga puslan man nga gidili ang poster sa mga kandidato nga sobra sa sukod, kinahanglan nga idili gyud sa Comelec ang pagpagawas ug patapot aning supak sa balaod ang gidak-on nga poster bisan wa pa ang giingon nga “official campaign period” ug gamiton ang mga dagko nga poster nga ebidensya batok sa kandidato sa iyang diskwalipikasyon.
Di ba hapsay unta ang trabaho sa Comelec ug limpyo pa gyud ang atong mga dapit?