DAGHANG dawunggan sa mga Sugboanon ang mitingkag sa dihang gianunsyo ni Toledo City Mayor Sonny Osmena nga iyang ipadayon ang pagbuak ug pagbuhat og laing probinsiya sa Sugbo kon siya mapiling kongresista sa umaabot nga piniliay.
Sa iyang kampanya sa niaging semana, ang mayor nga magpapili karon pagka-kongresista sa ikatulong distrito misaad nga kon buligan sa katawhan, una niyang ipalabang nga balaudnon sa kongreso mao ang paghimo sa 3rd District nga Cebu Occidental diin langkuban unya kini sa duha ka mga congressional districts ug ang Toledo City maoy magsilbing capital.
Nalakip sa tersero distrito ang mga lungsod sa Tuburan, Asturias, Balamban, Pinamungajan, Aloguinsan, Barili ug ang dakbayan sa Toledo. Dili kini maoy unang higayon nga ang Cebu gisuwayan sa kongreso sa pagbahinbahin human nagtinguha sa ingon ang pipila nato ka mga magbabalaod.
Niadtong 2005, dunay mga Sugboanong kongresista nga naghimo usab og mga balaodnon nga ilain ang ilang tagsatagsa ka mga distrito ug himuon kining laing probinsiya--butang nga gihulagway sa kadaghanan nga hinakog sa gahum.
Sagad ang misuway paghimo niini kadtong mga last termer nga kongresista, apan wala sila molampos tungod kay hugot kini nga gisupak sa mayoriya sa mga Sugboanon.
Duna usay mga opisyal sama kanila ni kanhi kongresista Eduardo Gullas ug Pablo John Garcia, Cebu City Mayor Tomas Osmena, kongresista Gwen Garcia nga maoy gobernador niadtong panahona, ang kusganon usab nga mialkontra sa lakang.
Karon si Sonny O na usab ang misuway, ug ambot makakombinse ba siya ning higayona nga gawas dako pa kaayo kining trabahuon, gisalikway na man unta kini sa mga Sugboanon.
Sa kadaghang problema nga atimanonon, ambot ug nganong ang pagsi-ak sa Sugbo mao pa may hatagan niya og prayoridad.