GIBUAK sa host Houston Rockets ang kaugalingon nilang rekord sa padaghanay og three-point shots sa usa ka duwa aron makmakon ang Phoenix Suns, 149-113, kagahapon sa National Basketball Association (NBA).
Walo ka mga magduduwa sa Rockets ang nakapabuto og three-point bombs nga gipangulohan nila ni Eric Gordon, kinsa adunay career-high nga walo ka tres. Si Gordon niamot og 26 puntos alang sa kadaugan.
Sama sa naandan, ang Rockets gipangulohan na sab sa kasamtangang MVP nga si James Harden, kinsa nagpakatap og 30 puntos lakip na niini ang lima ka three-point shots.
Ang three-point shot ni Austin Rivers sa nahabiling 1:09 minutos maoy nakabuak sa rekord sa Rockets. Niadtong mga gutloa, taga liog na ang labaw sa Rockets, 149-111.
“There was no choice. The ball was coming to me,” matod ni Rivers kabahin sa katapusan niyang tres sa kombati.
Gipasabot ni Rivers nga niadtong mga gutloa, wala siya masayod nga paingon nang mabuak sa Rockets ang kaugalingon niining rekord hangtod nga ang mismong mga tumatan-aw na ang naghatag kaniya’g senyales pinaagi sa pagsinggit og ‘threeeeeeee.”
“I think it made it interesting, especially toward the end,” dugang ni Rivers. “It made guys play for something else. When you’re up by like 35, 40 points, that’s a lot of points.”
Ang Rockets kaduha na ka mga higayon nga nakamugna og 26 ka three-pointers ning maong season.
Sa Oakland Arena, hingpit nang naangkon sa defending back-to-back champion Golden State Warriors ang No.1 spot sa Western Conference human nila gipanglampornas ang Los Angeles Clippers, 131-104.
Ang kadaugan nagtukmod sa Warriors sa maayo nga posisyon alang sa tinguha nilang madepensaan og balik ang kampiyunato gumikan kay maggunit sila og homecourt advantage batok sa ilang mga makontra sa playoffs gikan sa Western Conference.
Nanghinaot ang Warriors nga magbilin sila og Three-Peat sa dili pa sila mobiya sa Oracle Arena aron motapon sa bag-o nilang homecourt nga mao ang Chase Center nga nahimutang sa San Francisco.
“Hopefully we’ll have another send-off in a grander manner,” matod ni Warriors coach Kerr.
Ang Warriors, nga mingsaka sa 56-24 nga rekord, gipangulohan ni Stephen Curry pinaagi sa iyang 27 puntos samtang nidugang og 16 puntos si Kevin Durant.
Aduna pa’y laing lima ka mga magduduwa ang Warriors nga nakahimo og dobleng numero nga puntos.
Ang Clippers nagpabilin sa ikawalong dapit sa West dala ang 47-34 nga rekord. (AFP, ESL )