HANGTOD karon, nagpabilin gihapong gisumsuman ang kalit nga pagkatiurok sa defending champion San Miguel Alab Pilipinas sa naghinapos nga bahin sa Asean Basketball League (ABL).
Morag dili katuohan ang ilang sitwasyon nga yano ra kaayong giharos sa Hong Kong Eastern sa first round sa playoffs nga daw sa manok nga nasuso pagkaigo ug wala na makabangon.
Daghan mga factor nga angayan ikonsiderar sa ilang pagkatiurok. Una. Sa dihang gitugotan ang mga team sa pagkuha og ikatulong import, dili na sila makahimo niini tungod kay nisangko na ang ilang salary cap.
Sa ato pa, samtang ang uban adunay tagutlo ka import sila nagpabilin nga duha ra. Dili na usab sila maka-ilis og mga local players ilabi na kadtong mga nanga-injured kay naabtan na usab sila sa deadline.
Mao ni nga lupigon gyud sila sa lahutay. Pero nagkahiusa ang among obserbasyon ni Rico Navarro, ang media coordinator sa Alab dinhi sa Sugbo.
Para namo, sayo ra kaayo ang peak sa Alab. Sagunson dayon sila og 11 ka daog unya gipanglubong pa ang mga kontra. Taodtaod gud nilang nahuptan ang solong liderato.
Sa dihang gibati na og kakutas, mora og nikunhod na ang ilang labok ug gani dili na makamao mopahimutang sa bola sa mga krusyal nga mga segundos. Nawala ang ilang chemistry.
Resulta? Sa uwahing unom nila ka duwa, wa gyud tawoy nadag-an. Daghang leksiyon nga angay kat-unon sa maong kapakyasan.
•••
Usa diay sa mga coaching staff sa Alab si Eric Menk, asst. coach ni Jimmy Alapag. Si Menk, sa iyang panahon, nahimong star player sa PBA ug gani na-MVP kini niadtong 2005 ubos sa Barangay Ginebra, ang team nga iyang giduwaan sulod sa 11 ka tuig.
Ato ning gihisgutan si Menk ning atong lindog karon tungod kay gikatakdang modalikyat siya dinhi sa Sugbo karong Mayo 4-5. Pero dili isip usa ka player o coach kon dili isip usa ka speaker sa usa ka media workshop nga ipahigayon diha sa Phinma Southwestern University campus.
Kini man gud si Menk, human moretiro sa pagka professional player, nagtuon og broadcasting sa media industry ilabi na sa digital ug social media. Aduna usab kini siyay podcast nga giulohan og “Staying Major” diin dinhi iyang gisaysay ang mga isyu nagpalabot sa natad sa paugnat sa kusog.
Iya usab ipasawo ang iyang mga kasinatian kalabot sa mga daghang interviews ngadto kaniya ug ingon man isip interviewer.
Kon sa una siya maoy perming interview-hon, karon siya na usab ang mag-interview.
Si Menk unang nasulod sa PBA ubos sa Tanduay Rhum niadtong tuig 1999, dayon nakuha sa Ginebra. Nakaduwa usab siya sa San Miguel Beer, Alaska Aces ug GlobalPort.
Dili kini maoy unang higayon nga si Menk mahimong speaker. Kadaghan na kini siya mahimong speaker ug gani karong Mayo 11 ug 12 anaa na usab siyay imbitasyon sa Metro Manila workshop sa Development Academy of the Philippines. (Alang sa inyong sugyot ug panahom mahimong mo-email sa jun.migallen22@gmail.com)