NAANGKON sa Mandaue City ug Consolacion Sarok Weavers ang katapusang duha ka luna sa quarter-finals sa 2019 Governor’s Cup Inter-Cities/Municipalities Basketball Tournament.
Nahimo kining posible human gipukan sa Mandaue ang Consolacion, 76-65, niadtong Dominggo sa mismong balwarte sa Sarok Weavers.
Ning maong kadaugan, ang Mandaue nakapugos og triple-tie sa 6th district kauban ang Consolacion ug Cordova sa 2-2 nga rekord.
Sa quotient, nag-una ang Mandaue City nga mitali og 1.120 unya nagsunod ang Consolacion nga adunay 0.959 samtang nangiwit ug nanamilit ang Cordova nga adunay 0.935.
Sa single round-robin quarterfinals, ang Mandaue nasulod sa Bracket A kauban ang Danao City, Medellin, Balamban, Argao, Samboan ug Dumanjug.
Samtang ang defending champion Talisay City maoy mangulo sa Bracket B kauban ang Tuburan, Sogod, Minglanilla, Alegria, Tabuelan ug Consolacion. (RSC, ESL)