HUMAN ni Floyd Mayweather Jr., misunod si Filipino boxing legend Manny Pacquiao sa pagpirma og kontrata sa Rizin, usa ka Japanese mixed martial arts organization.
Ang Rizin maoy promoter sa usa ka exhibition bout diin nakig-away si Mayweather og usa ka mixed martial arts (MMA) fighter niadtong Disyembre 31 sa Japan.
Si Rizin CEO Nobuyuki Sakakibara nag-post og mga hulagway sa iyang Twitter account nga nagpakita sa Pambansang Kamao ng Pilipinas nga mipirma kon kontrata.
“I’m here in the Philippines. RIZIN.15 will have this man involved in a way. We will be ready to announce as I get back to Japan!” pamahayag ni Sakakibara.
Wa hinuon niya giklaro kon unsa ang kalambigitan ni Pacquiao sa nakatakdang promosyon sa Rizin karong Abril 21.
Si Pacquiao katapusang miaway niadtong Enero diin nadepensaan niya ang iyang World Boxing Organization (WBO) pinaagi sa dominanteng unanimous decision nga kadaugan batok kang Adrien Broner.
Gikatakda nga moaway na usab ang fighting senator karong tuiga aron pagdepensa sa iyang kampiyonato.
Wa pa man tuod matino ang pitsa ug wala pa usab mahingpit kon kinsa gayod ang iyang makontra, apan posibling karon kining Hulyo mapahigayon.
Usa sa gipanglantaw nga posibling makontra ni Pacquiao mao si WBA super welterweight champion Keith Thurman o kaha si kanhi two-division champion Danny Garcia. Apan kinahanglan una nga modaog si Garcia batok ni Adrian Granados karong April 20. (ESL)