SECTIONS
Monday, August 19, 2019
SUPERBALITA CEBU

20 pa ka Kuratong naa sa Cebu: Entoma

DI MOMINUS sa 20 pa ka mga sakop sa Kuratong Baleleng ug Ozamis robbery-drug group ania sa Sugbo naglublob tungod sa tabang sa pipila ka mga negusyante nga ilang nahimong mga higala.

Apan giklaro ni Mandaue City Police Office director Police Col. Julian Entoma nga wa kini magpasabot nga ang mga negusyante dunay kalambigitan.

Apan usa sa mga Parojinog nga nasikop niadtong Biyernes sa gabii, Abril 5, sa police operation, niawhag sa kapulisan ug publiko nga di isipon nga ang tanang mga Parojinog mga sakop og sindikato.

NGANONG MANDAUE

Kon nganong sa dakbayan sa Mandaue kasagaran nga nisulod ang mga sakop sa Kuratong Baleleng, matod ni Entoma nga ilang nasuta nga tungod sa mga negosyante sa Sugbo nga adunay negosyo sa Mandaue City nga suod nga higala kaniadto sa pamilya nga Parojinog, nakasulod ang ilang mga sakop.

Ang mga Parojinog naghupot sa Ozamis City hangtod nga napatay sila si Mayor Reynaldo Parojinog, Bise Mayor Princess Nove-Parojinog Echavez ug uban pa niadtong 2017 atol sa usa ka police operation.

Tungod sa kadugay na nila sa katungdanan, ang mga Parojinog nakaestablisar og mga contact, sama sa negusyante, dinhi sa Sugbo.

Sa mga negusyante, upat kanila nailhan na sa kapulisan, usa niini mao ang nakalingkawas gikan sa pagpamanhig niadtong Pebrero.

Giklaro ni Entoma nga wa kini nagpasabot nga ang maong mga negosyante direktang nalambigit na sa ilegal nga patigayon.

“Gi-monitor man nato sad ning mga negosyante. Gisuta nato sa ilang mga negusyo kon wala ba nalambigit sa ilegal. Basin kini sila tungod sa panaghigalaay sa una maglisud sila og balibad. Apan kon sila gyud ang usa sa paagi hinungdan nga ania sa atong lugar ning mga tulisan ug robbery-drug group sa Ozamis, mamahimo sila nga protector, harboring criminals, kay uban ani naay mga warrant of arrest na. So, mas maayo nga moduol sila sa police kon ugaling gi-kontak o giduol sila niining maong grupo,” awhag ni Entoma.

NANGABOT

Ang upat sa napatay ug nasikop sa police operation sa MCPO niadtong Abril 5 sa gabii, nalakip sa 17 ka mga sakop sa naila nga Parojinog robbery-drug group nga na-monitor nga niabot sa Dakbayan sa Mandaue niadtong Marso.

Matod ni Entoma nga nakadawat sila og impormasyon nga human sa subsob nga paggukod sa awtoridad sa ilang grupo sa Ozamis City ug ang pagpuhag sa ilegal nga drugas nga patigayon, manulis na sila.

Tumong niini aron makatigom og kwarta alang sa piniliay.

Gawas sa tulis, magsilbi usab silang gun-for-hire.

Tungod sa tinabangay sa Ozamis Police ug sa Mandaue City Police Office, nasuta nga ang 17 nangabot niadtong Marso 8, giingon pito ningpuyo sa barangay Tingub, diin si Frederex Secretario niabang sa ilang kapuy-an.

Samtang ang laing 10 giingon nga anaa sa Barangay Looc, ilabi na ang gipangita nila nga most wanted nga tulisan lukop nasud nga si Glenn Gelbero Tairos, kinsa adunay patung-patung nga kaso sa robbery sa Luzon ug sa Mindanao.

Sa pagpaubos sa surveillance, nasuta nga armado ang grupo hinungdan nga giaplayan sila og search warrant sa kalapasan sa paghupot og dili lisensyadong armas.

Atol sa duha ka dungan nga operasyon, namatay sila si Eduardo Baliling, kinsa usa sa subject sa warrant sa barangay Looc ug kauban nga si Henry Labajo.

Nasikop ang laing kauban niini nga si Elizardo Colanag.

Samtang patay usab si Jessie Parojinog sa operasyon sa Barangay Tingub, apan giingon nga nakaeskapo si Secretario ug nasikop ang ig-agaw ni Jessie nga si Niel Parojinog.

Apan alang sa duha sa mga nasikop, wa silay labot sa giingong nga sindikato.

Si Colanag nga taga Tagbilaran, sa lalawigan sa Bohol, usa ka mekaniko, niingon nga igo ra siya nga gipaayo sa tricycle ni Baliling nga naguba.

Samtang si Niel nihangyo sa publiko ug kapulisan nga dli i-tanan nga Parojinog ilhon nga kriminal. Matod niya nga anaa lang sila sa Mandaue aron manginabuhi.

“Hangyo unta ba nga dili intawn tanan nga Parojinog, bisan man tinuod mga paryente namo tong mga Parojinog nga buluyagon, pero naa pa sad mga Parojinog nga sama namo nga naningkamot lang nga manginabuhi og tarung,” asoy ni Niel, 24, apan nagdumili na sa pagtingog kalabot sa kaso nga giatubang.

Ang kasagaran sa gipaubos sa operasyon giingon nga nagtrabaho isip mga tricycle driver sa lugar.

Ang laing ig-agaw niini nga si Danilo Parojinog, kinsa usa usab ka tricycle driver, gipusil patay, Sabado sa kaadlawon.

Apan duda ni Entoma nga mga kontra niini sa lokal nga drug group ang nipatay niini.

Sila si Danilo ug Jessie nasuta nga duha na ka tuig nga su’d ug gawas sa dakbayan sa Mandaue, samtang si Niel nitug-an nga pipila pa lang siya ka buwan.

Sa 17, aduna pay 13 ka mga kauban niini ang gipangita, apan matod usab ni Entoma nga anaa pa usab silay gipangita nga 12 ka mga sakop sa Parojinog robbery-drug group, nga mga wanted sa Ozamis City, usa na niini si Marlon Parojinog.

Ang 17, ang giingon kauban nila ni Renan Mabida ug Mark Lester Castro, kinsa napatay sa Barangay Cubacub niadtong Septiyembre sa miagi nga tuig.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph