GITINGUHA sa Philippine Drug Enforcement Agency ( PDEA) VII nga mapatuman ang drug-free workplace sa mga pribadong establisemento sa dakbayan sa Sugbo ug sa Central Visayas.
Si PDEA Regional Director Wardley Getalla niingon gigamit na sa mga iligasta ang mga establisemento para sa ilang ginadili nga kalihukan.
“Marami tayong reports and seizures involving drug activities inside hotels, motels, condominium as well as bars,” pasabot ni Getalla kansang dru- free workplace nagsugod sa ilang central office.
Iyang gisaysay nga dinhi sa dakbayan sa Sugbo lisod madeklara ang usa ka barangay nga walay drugas hinungdan nga ilang sugdan sa private companies.
“Actually wala pa so far. Medyo mahirap ang declaration ng drug free barangays dito. Kung nahirapan tayo sa barangay bakit hindi natin subokan sa private establishment,” dugang ni Getalla.
Ang PDEA makig-alayon ngadto sa local government units aron iapil sa ilang mga rekisito nga dili hatagan og business permit ang mga kompaniya nga dili madeklarar nga drug-free pinaagi sa pag-drug test sa ilang mga kawani.
Ang PDEA kauban ang Philippine National Police, Department of Interior and Local Government (DILG) ug ubang ahensiya sa gobiyerno kauban ang mga barangay kapitan nagtapok para sa ilang quarterly meeting sa City Anti Drug Abuse Council (CADAC) nga gipangulohan ni Garry Lao, isip chairman.
Si Lao niingon nga ila pang ipaabot ang maong plano ngadto sa libuan ka mga business owner sa dakbayan para sa ilang kooperasyon.
“Let’sdo it, one step at a time. Kinahangkan atong mapasabot ang mga establishsment,” dugang padayag ni Lao, kinsa nipadayon sa programa nga drug-free workplace sa 80 ka mga barangay hall sa siyudad.
Iyang hangyuon ni Konsehal Franklyn Ong, presidente sa Association of Barangay Council (ABC) nga mopalabang og ordinansa nga nagmando sa mga business owner nga mopailawom og seminar ug drug test ang ilang mga empleyado ug madeklara nga drug-free workplace.
Si Lao niingon nga ang gubat batok sa illegal drugs dili lang sa public officials inay pagtambayayong sa tanang sektor labi na sa pribado aron likayan ang drugas.
Ang pangulo sa ABC nga si Ong niingon nga ila pang susihon ang mga ordinansa nga napasar sa kanhi administrasyon para ilang mabuhatan sa maong katuyoan.
Sa sunod nga CADAC meeting, ang Department of Labor and Employment (Dole) ug Cebu Chamber of Commerce and Industry (CCCI) lakip sa ilang patambungon para mapasabot kanila ang kamahinungdanon sa pagpatuman sa drug-free workplace subay sa Republic Act (RA) 9165 kon Dangerous Drugs Act. (PAC)