PITO ka mga truck ang napuno sa campaign materials nga gitangtang sa mga lugar gawas sa common poster areas nga gitugot sa Commission on Elections (Comelec) sa dakbayan sa Sugbo.
Si Atty. Marchel Sarno, election officer sa South District, niingon nga upat ka mga sakyanan ang ilang nakargahan samtang, tulo sab sa North District ni Atty. Chauncey Boholst atol sa ilang simultaneous removal kagahapon sa hapon, Abril 8.
Si Sarno niingon tanang kandidato sa Bando Osmeña Pundok Kauswagan pinangulohan ni Mayor Tomas Osmeña ug Mary Ann de los Santos, Kongresista Rodrigo Abellanosa pulos nakuhaan og election materials mga wala sa common poster areas.
Mao sab ang sa habig sa Barug-PDP-Laban nilang Bise Mayor Edgardo Labella ug iyang runningmate nga si kanhi Mayor Michael Rama ug kandidato pagka-kongresista nga si Konsehal Joy Pesquera ug Richard Yap nga nagpapili pagka-kongresista sa North District.
“It appears nga tanang kandidato naa silay mga posters outside the common poster areas,” padayag ni Sarno.
Lakip sa barangay sa south nga ilang gilimpyohan mao ang Pasil, Duljo Fatima, subay sa N. Bacalso ug V. Rama avenue.
Ang grupo ni Boholst nisugod sa barangay Pahina Central, Sambag-I ug paingon sa barangay Luz kansang operation nilanat og dul-an sa tulo ka oras.
Adunay say partylist ug kandidato sa pagkasenador nga gilangkuban nilang Mar Roxas, JV Ejercito, Bato dela Rosa, Bong Go, Imee Marcos, Bong Revilla, Serge Osmeña ug uban pa.
Ang election materials gipalabay sa duha ka election officer aron dili na ma-recycle sa mga kandidato.
Ilang kaabag ang Department of Public Works and Highways (DPWH).
Ang election materials mga gipapilit sa pader igo nalang gipintalan og puti sa Comelec kay maglisod sila og tangtang.
Giklaro ni Sarno nga maglisod sila og patuman sa Republic Act 9006 kon Fair Election Act kon way abag sa publiko.
“Giawhag nako kadtong mga tawo nga saksi sa pagpailit nga hinaut pa nga ilang tabangan ang Comelec..” panawagan ni Sarno.
Ang election officer niingon nga adunay posibilidad mga mapahamtangan og silot ang mga kandidato sa election offense nga ilang nabuhat kon adunay mosaksi apan kon wala, iyang giangkon nga maglisod sila.
Gihulagway ni Sarno nga sayon ang pagpasangil apan lisod ang pagpruyba didto sa korte.
Ang mga kandidato nga mapamatud-an, mahimong mapahamtangan og usa ngadto sa unom ka tuig nga pagkabilanggo ug ang labing bug-at nga silot mao ang pagka-disqualify ug gidid-an sa pagpapili sa bisan unsa nga posisyon sa gobyerno lakip na ang pagboto, dugang sa election officer.
Taliwa sa kadaghan sa mga poster nga gibutang gawas sa designated area apan, walay bisan usa ka saksi ang nangisog pagduso og reklamo ngadto sa ilang buhatan.
Gumikan niini, iyang gihangyo ang mga pulitiko nga mahimong responsabli sa paggamit sa ilang mga poster gawas nga gasto kini og kwarta, ang Comelec makapahimo pa og laing aktibidad gawas sa Oeration Baklas, dugang ni Sarno, luwas pa sila sa posibleng kaso batok kanila.
Ang Comelec Cebu City molusad og laing Operation Baklas sa mosunod nga mga semana ug ning bahina, kauban na nila ang ubang ahensiya nga gipangulohan sa Philippine National Police (PNP).
LAPU-LAPU CITY
Nanangtang ang mga sakop sa Commission on Election Comelec sa dakbayan sa Lapu-Lapu kagahapon, Abril 8, og campaign materials isipg kabahin sa ilang Oplan Baklas.
Unang girumbo sa mga sakop sa Comelec uban sa ilang mga personnel ug kapulisan ang Brgy. Pusok paingon sa Brgy. Pajo sa dakbayan diin ubay-ubay nga campaign materials ang gitangtang gumikan kay wala sa designated poster area, nasubraan sa gidak-on ug anaa usay uban nga walay rason nga ipahimutang sa dakbayan sanglit dili sila mahimo nga mabotaran sa mga Oponganon.
Matod ni Benjie Dayondon, election officer II sa Comelec Lapu-Lapu, nga 26 ka mga designated areas kun common poster areas ang gitudlo sa dakbayan nga mahimong mabutangan og campaign materials basta mosunod lang sa gidak-on nga gi-limit sa Comelec sa ilang mga campaign posters.
Gilatid nga 2 x 3 ft ang gidak-on sa campaign materials sa usa ka kandidato samtang 12 x 16 feet o dili molapas 192 sq ft ang gitugot sa campaign materials sa tibuok partido.
Samtang, 4 x 6 ft usab ang alang sa mga independente.
Giklaro ni Dayondon nga gawas kagahapon gikatakdang mosuroy sila sa tibuok dakbayan kaduha sa usa ka semana hangtod sa dili pa ang Mayo 13 nga piniliay aron masigurong ila gayud nga matangtang ang mga nakalapas nga campaign materials.
Ang usa kandidato nga masakpang nakalapas sa fair elections act mahimong matangtang o ma-disqualify sa umaabot pinilay.
Tanang kandidato hinuon sa dakbayan mipasalig sa Comelec nga mosunod sa ilang lagda atol sa ilang gipatawag nga panagtigom niadtong miaging Sabado Abril 6.
Ang 26 ka mga common poster area mao ang atubangan sa Mactan Shrine, crossing sa Datag, Maribago, eskina sa Scared Heart Parish sa Marigondon, Pajac (Rotunda) Fuentes Road, Basak atubangan sa Pueblo Verde Tamiya, Basak Aviation Road luyo sa Saint Augustine School, crossing sa Gun-ob, Looc, ug Canjulao, crossing sa Agus paingon sa Maribago, eskina Agus paingon sa Brgy Hall, boundary sa Buaya ug Mactan, Mactan eskina Mactan National High School paingon sa Bangkal, Mactan eskina Angasil tupad sa Mactan Newtown, Mactan ug Maribago eskina Mahayahay, Mactan eskina Mactan Seabreeze, eskina ikaduhang taytayan sa Lapu-Lapu (Pusok Area), Mairgondon eskina Ylaya, Marigondon atubangan sa Soltana Condo (bakanteng luna), Buaya eskina Buaya wet market, atubangan sa dalan daplin sa Talima mini cityhall, atubangan sa Sta Rosa port, Sabang eskina Tungasan road ug Tungasan corner Caw-oy road.