MGA balay patigayon, sama sa mga tindahan, pawnshops, bangko ug uban pa giawhag sa kapulisan sa Dakbayan sa Mandaue nga mas mopahugot sa ilang gipatuman nga seguridad.
Di lang ang Siyudad sa Mandaue, apan lakip na sa silingang mga siyudad ug kalungsuran, human nga pabilin pa nga gawasnon ang uban nga gitumbok nga mga sakop sa Ozamis robbery group.
Matod ni Police Colonel Julian Entoma nga usa sa ilang nakuha nga impormasyon nga duha sa mga hardware sa syudad sa Mandaue punterya na unta nga tulison sa grupo sud ning bulana. Gani nakuha pa nila ang plano ug adlaw unta sa pag-igo.
Tulo sa giingong mga sakop sa grupo ang napatay sa managlahi nga mga operasyon sa miaging semana.
Duha usab ang ilang nasikop, apan hugtanon silang nanghimakak nga mga sakop sila sa Ozamis robbery group o Kuratong Baleleng.
Labing minos 20 pa ka mga sakop sa grupo ang gawasnon.
Ang grupo usab gidudahan nga maoy nanulis sa bakeshop sa syudad sa Sugbo ug pawnshop sa lungsod sa Liloan.
Hinungdan nga bisan kon ang kapulisan hugot ang paggukod sa grupo, niawhag sila sa mga establisemento nga siguruon nga abtik ang ilang mga security guard.
Giawhag nga mas maayo nga focus kini sa pagbantay sa mga kustomer ug di na nga mao pay moasikaso kalabot sa parking sa mga sakyanan.
Dungagan pa ang mga CCTV camera ug siguruon ang alarm system nga konektado sa police station aron dali nga marespondehan sa mga pulis kon ugaling moigo ang grupo.
“Ang mga guard sa business establishment ang dili gyud palipat. Bawal ang mga gwardiya nga mao pay mo-assist sa mag-park kay ana nga paagi, dali na sila madis-armahan o posibleng mapusilan pa gani. Kay kini sila base sa ato intelligence gathering, kasagaran gani ani mga .45 kalibre ang armas. Mao gani gisusi nato nga posibleng kini na sila ang likod sa mga motor-riding shooting incidents sad o uban pa nga kaso sa mga pagpamusil patay,” gitug-an ni Entoma.