SECTIONS
Friday, August 23, 2019
SUPERBALITA CEBU

Gilabay sa septic tank

DIHANG BUHI PA: Si Tesa Marie Ygay dihang buhi pa. Si Tesa Marie missing na sukad sa miaging semana, apan tungod sa pagpa­ngalisbo sa iyang lawas sulod sa usa ka septic tank, nakaplagan kini Lunes sa buntag. (Gikan sa iyang fb page)

PATAY nang nakaplagan nga naglutaw sud sa septic tank niadtong Lunes sa buntag, Abril 8, ang usa ka 14 anyos nga dalagita nga unang gipangita sa iyang pamilya.

Ang biktima mao si Tesa Marie Ygay, molupyo sa Sitio Kamalig Bato, Barangay Tabok, siyudad sa Danao.

Usa ka gwardiya nga si Jessie Montes Medequillo, 36, ang gipangita sa mga sakop sa Danao City Police Station nga maoy gidudahan nga nipatay sa biktima.

Si Police Corporal Mark Anthony Manulat sa Danao City Police Station, nibutyag nga una silang nakadawat og tawag gikan sa usa ka nagpakabanang sibilyan gumikan sa grabe kabaho sa abli nga septic tank luyo sa Cogon Cruz Integrated School.

Dihang gisusi sa mga pulis, sila nakugang sa ilang nakit-an nga lawas sa usa ka babaye nga naglutaw sa septic tank.

Si Felimon Enoy, papa ni Ygay, dali nga nakaila sa lawas sa iyang anak base sa klase sa haircut sa buhok niini.

“Atong petsa 25 (Marso) giupawan na siya anang lakeha, maong akong gipa-blotter,” asoy sa amahan sa SunStar.

Katapusan niya nga nakit-an ang iyang anak nga babaye samtang naa kini nagpuyo uban niya sa siyudad sa Lapu-Lapu sa miaging semana.

Si Enoy nibutyag nga personal siya nga nakaila ni Medequillo sukad nga nangulitawo kini sa iyang anak.

Sa miaging buwan, nagpatabang si Ygay sa iyang amahan human si Medequillo nisuway og paupaw sa iyang buhok tungod sa selos.

“Giopawan niya akong anak kay para dili siya magsige’g lakaw. Kay magselos siya nga naay lain magduol-duol sa akong anak,” asoy niini.

Iyang gidala ang iyang anak sa barangay aron isumbong ang gibuhat ni Medequillo.

Aron maprotektahan ang anak, giingnan kini ni Enoy nga adto mopuyo sa ilang mga kabanay sa Lapu-Lapu.

Apan human sa pipila ka semana, si Ygay giingong nibiya sa Lapu-Lapu human makadawat og mensahe gikan ni Medequillo nga giingong nihulga niini nga patyon kon dili kini mobalik niya.

Human mahibawo nga nipauli si Ygay sa Danao, si Enoy ug iyang pamilya nangita niini sa tunghaan diin nagbantay si Medequillo niadtong Sabado, Abril 6.

“Pagka Sabado, giadto naman ko sa amoa sa gwardya nga karelibo niya, “Noy, tan-awa kuno to ngadto ang guard house kay daghan kaayo dugo. Unya didto ra ba kuno to imong bata kagahapon sa hapon (Biyernes), naay nakakita, tan-awa kuno to ngadto,” mao to dali kaayo ko nakaari (tunghaan),” asoy sa amahan base sa gisulti kaniya sa karelibo nga gwardya ni Medequillo.

Dihang ilang giadto ang guard house sa eskwelahan, wala si Medequillo ug Ygay.

Apan nakulbaan si Enoy dihang iyang nakit-an ang usa ka kutsilyo, piko, steel pipe ug bato nga dunay mga dugo sud sa guard house.

Dali sila niadto sa police station aron pag-report.

Human sa duha ka adlaw, nakit-an ang lawas ni Ygay.

Si Jesaver Ygay, maguwang sa biktima, nisulti sa SunStar Cebu nga nakaila sila ni Medequillo dihang 10 anyos pa lang si Ygay kay magpalitan kini og kulonon (clay) sa ilang balay aron himuong kaang.

Matod niya, dugay na nangulitawo ang suspek sa iyang manghod apan balibaran kini sa ilang igsuon kay giisip kini nga ikaduhang amahan.

Maghatagan kini og kwarta sa iyang manghod kay gusto niini nga mao nay mobuhi sa dalagita.

Si Medequillo gipangita na sa mga pulis ug giingong ni-resign sa trabaho isip gwardya pipila ka adlaw sa wa pa makit-i ang lawas ni Ygay sa septic tank. (JKV, Allan Cuizon sa Sunstar Cebu)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph