NAGKATAP ang mga hulagway diha sa social media kalabot sa mga tarpulin sa mga magpapili sa posisyon sa Partido sa PaDayon Pilipino provincial slate partikular sa lungsod sa Villanueva, Misamis Oriental.
Kini ang gikumpirma ni Governor Bambi Emano sa prensa atol sa proclamation rally sa Gingoog City.
"Naguba siya sa lungsod sa Villanueva raman pod gipanglasnit, gipangisi ang poster sa Villanueva, siguro desperado ang among mahimong kaatbang ug dili siguro sila ganahan makita ang among mga pangit nga dagway sa ilang lungsod mao gipanglanit,” matud niya.
Dugang niini nga matag piliay adunay mga hagit ug lain lain ang hitsura.
"Apan kung imong basihan basin og masayop ko ang kainit sa pagdawat sa tao nagtoo ko nga dako kaayo og kahigayonan ang among mga kauban,” dugang niini.
Gibutyag sab niini nga wala siyay mahimo kung ingon ana ang kinaiya sa iyang mga kaatbang basta sila nisunod sa balaod sa Commission On Election (Comelec).
Samtang gisultihan ni Emano ang iyang mga supporters nga dili mohimo og susama niini nga mga kalihokan.