NAHULOG sa mga kamot sa otoridad ang usa ka Dutch national human kini nadakpan pinasikad sa warrant of arrest didto sa Barangay Poblacion, lungsod sa Initao, Misamis Oriental.
Giila ang dinakpan nga mao si Andre Darel Van Der Born, 51, usa ka negosyante ug residente sa Barangay Amoros, siyudad sa El Salvador, Misamis Oriental.
Hiniusang operasyon ang gihimo sa Initao Police Station sa pagpangulo ni Police Captain Arlyne Ranario ug El Salvador City Police Station Chief Randy Anito.
Matud ni Ranario sa Sun.Star Superbalita nga ang warrant of arrest batok niini nga adunay kasupakan sa RA 9262 kon Violence Against Women and Children ang gipasaka sa giingong asawa niini didto sa Cebu City ug giisyu ni Judge Jose Nathaniel Andal.
Adunay girekomendar nga piyansa nga mobalor og P24,000.
Nakigkoordinar ang Cebu sa El Salvador Police Station human mao kini ang address ni Der Born apan diay mibalhin kini sa lungsod sa Initao sa pagpuyo.
Dugang ni Ranario nga wala nasab napriso ang dinakpan human deretsong nakapiyansa atol sa pagkasikop niini.