TIKLO ang usa ka lalaki human nanulis sa duha ka mga dalaga mga alas 8:00 sa gabii diha sa atubangan nga bahin sa usa ka pribadong tunghaan sa Barangay Carmen ning siyudad sa Cagayan de Oro.
Ang suspetsado naila nga si Oliver Oliva, 21, taga Zone-10, Purok 2, Upper Carmen ning siyudad samtang ang mga biktima mao sila si Lucita Pahanggin, 33, dalaga ug Gene Ann Parilla, 17, dalaga, pulos residente sa Barangay Bulua ning siyudad.
Sa nahipos nga impormasiyon gikabutyag nga samtang sakay sa motorela ang mga biktima nideklara og tulis si Oliva ug giti-onan sa mahait nga hinagiban ang mga dalaga dayong ingon nga “ambi inyo cellphone” ug lakip nadala niini ang P70 nga cash.
Dali usab nga nagpakitabang sila si Pahanggin ug Parilla sa kapulisan sa Police Station 4 (PS4) sa Carmen ubos ni Police Major Ian Borinaga hinungdan na usab nga nagpahigayon og hot pursuit operation ug nasikop ang suspetsado. Positibo usab nga giila sa mga biktima ang sa pagkuha sa ilang mga butang.
Nakaangkon pa og bun-og ang maong suspek human kini gitabangan matud og kulata sa mga tambay. Narekober gikan kay Oliva ang kutsilyo apan wala na mabalik ang mga cellular phone sa mga dalaga.
Ang maong suspetsado ang nagtingkagol na sa Maharlika Detention Cell (MDC) alang sa pag-atubang sa tukmang kaso batok niini.