GI-KLARO ni kanhi Philippine National Police (PNP) chief Ronald “Bato” dela Rosa nga wala kini nakitang ebedensiya nga makapamatuod nga dunay kalambigitan sa “drug trade” sa nasud ang kanhi economic adviser sa Presidente Rodrigo Duterte.
Kini human namahayag si Colonel Eduardo Acierto, kanhi opisyal sa kapulisan kalabot ni Michael Yang nga giingong “drug lord” ug nag-operate og drug laboratory sa Cagayan de Oro ug Davao City.
Matud ni Dela Rosa nga nagpasa na kini og report kaniya ug sa Presidente Duterte niadtong tuig 2017 sa kalambigitan ni Yang apan giingong gi-cleared na kini sa pangulo.
Sa pagbisita ni Dela Rosa sa siyudad sa Cagayan de Oro atol sa senatorial caravan ubos sa Hugpong ng Pagbabago gibutyag niini nga karon lamang kini nigawas nga isyu gumikan kay eleksiyon na.
“Nigawas naman na karon kay election na, too mo ana, number one sa iyaha gikan ang info 2004 pa daw na nga info nya wala niya na validate kay wala gyud hard facts nga maglink anang tawhana,” matud ni Dela Rosa.
Gidugang pa niini nga sa dihang anaa pa sa Davao naningkamot kini nga masuta ang personalidad niining maong negosyante gumikan kay madudahon kini isip usa ka pulis apan sa kataas nga panahon wala gihapon kini makitang ebedensiya.
“Apan sulod sa kataas sa panahon wala gyud nako na validate, walay confirmation dili man pud nako pwedi patyon diretso tungod kay intsik, patyon nako diretso? dili man na pwedi,” dugang ni Dela Rosa.
Giingong kinahanglan man gyud og ebedensiya nga magpamatuod nga duna kini kalambigitan apan wala kini makitang lig-on nga mga ebedensiya.
Gipasabot usab niini nga wala kini mag-ingon nga limpyo kining maong tawhana ug wala kini malabigit sa ilegal nga druga apan ang masulti niini nga wala kini ebedensiya nga nakita nga makatumbok niini aron nga mapasakaan og kaso.
Gibutyag usab niini nga dunay na nga nagmando kaniya bisan sa mayor pa si Duterte nga dili palabyon ang si bisan kinsa nga makumpirma nga nalambigit sa ilegal nga druga bisan gani kung iya pa kining paryente o anak.