TUNGA sa adlaw nga magpuasa sa tubig ang pipila ka konsumidor sa Metropolitan Cebu Water District (MCWD) sa unom ka syudad ug lungsod karong umaabot Semana Santa.
Ang maong water service interruption molungtad kini og 13 ka oras hinungdan nga giabisohan ang apektado nga mga konsumidor nga magpundo daan.
Rason sa maong wala’y agas tungod sa preventive maintenance sa supplier sa MCWD nga Cebu Manila Water Development (CMWD) sa lungsod sa Carmen.
Mahitabo ang maong service interruption karong Miyerkules Santo, Abril 17, ug Huwebes Santo, Abril 18.
Mohimo og desilting ang CMWD aron mapalambo pa ang ma-supply niini sa MCWD human alkanse kini maalkanse og 40,000 cubic meters matag adlaw tungod sa dry spell.
Nasayran nga anaa sa 39,000 cu.m. matag adlaw ang ma-supply sa CMWD.
Ang desilting usa kini ka proseso diin tangtangon ang nagbara nga bas o lapok sa tubig aron kini magamit.
Tinuig na kini nga gihimo sa CMWD hilabi na sa panahon sa ting-init aron madungagan ang ilang supply.
Lakip sa apektado nga mga local government unit mao ang sakaon ug sudlunon nga dapit sa Compostela, Liloan, Consolacion, Mandaue City, Lapu-Lapu City, Mabolo, North Reclamation Area, Pier area, Carreta, M.J. Cuenco Ave., Lorega-San Miguel, T. Padilla, Tejero, Tinago, parte sa Imus Road, sa Cebu City.
Makig-coordinate usab ang MCWD sa LGUs sa pagpakatap og water trucks aron masiguro nga anaa’y supply kon nagkinahanglan na gyud.