NAGKALAWOM ang misteryo sa pag-isa sa kamot.
Mao kini ang miresulta sa kontrobersiya sa pagsaka ni Davao City Mayor Sara Duterte-Carpio sa kamot ni Kong. Art Yap (Bohol 3rd District).
Ang maong hulagway gipatik sa mga tarpaulin og gipahimutang sa mga lain-laing lugar sa Bohol.
Peke kana, dili tinuod, gi-photoshop lang na, matod pa sa mga misuporta kang kanhi CabSec Jun Evasco.
Unsaon god pag-endorso ni Inday Sara kang Art Yap nga mi-endorso na man niya si CabSec? Dili baya na siya duhay-nawong, dugang pa sa uban.
Mipagawas og pamahayag ang kampo ni Kong. Art Yap og mi-insister nga tinuod og dili peke ang maong hulagway sa pagsaka sa kamot.
Tinuod kining maong hulagway og dili photoshop, matod pa sa dumadapig ni Yap.
Bakak kana, dili tinuod.
Namotbot na pod, dugang pa sa kampo ni CabSec.
Apan karong bag-o pa lang, mipagawas na sab og laing litrato ang kampo ni Kong. Art Yap nga nagpakita sa laing pagsaka sa kamot ni Inday Sara Duterte-Carpio sa kamot ni Yap.
Pebrero karong tuiga kini nahitabo, matod pa sa iyang kampo.
Nan karon, moingon pa gihapon mo nga peke kining maong hulagway, hagit-dasdas sa kampo ni Yap.
Nahilom ang mga dumadapig ni Evasco sa maong hulagway.
Dili na nila matapin-an sa pag-ingon nga peke o photoshop ang maong hulagway sanglit klaro man kaayo nga tinuod gyod kini, matod pa sa usa ka dumadapig ni Yap.
Tinuod lagi kanang maong hulagway. Gisaka tuod ni Inday Sara ang kamot ni Yap. Apan hunahunaa nga Pebrero kana. Sa dihang mianhi si Inday Sara sa Tagbilaran atol sa rally sa Hugpong ng Pagbabago kaniadtong nakalabay nga Marso, gisaka niya ang kamot ni Evasco.
Plus, klaro pa gyod kaayo ang iyang gisulti nga si Evasco ang gi-suportahan sa ilang pamilya sanglit dugay na kaayo nga panahon nga nagakauban si Evasco sa ilang pamilya.
Unya sa dihang gipangutana sa mga media si Inday Sara bahin kang Kong. Art Yap, misulti kini nga si Evasco ang ilang paluyohan.
So dili na lang nato linglahon ang mga tawo bahin anang mga butanga, panapos sa usa ka dumadapig.
Nganong dakoon man ninyo kanang pagsaka sa kamot? What’s the big deal sa pagsaka nga kon huna-hunaon, parehas man silang duha nga gisaka ang kamot ni Inday Sara, tubag sa usa ka dumadapig ni Yap.
Nganong masuko man mo nga mosaka si Inday Sara sa kamot ni Kong. Yap bisan kon gisaka na niya ang kamot ni Evasco nga kon hunahunaon, mao man sab nay gihimo ni Evasco sa congressional sa 3rd district, paapas nga sudya sa dumadapig ni Yap.
Di ba gisaka ni Evasco ang kamot ni VGov Dioning Balite. Gisaka sab ni Evasco ang kamot ni Cheche Toribio. Gisaka sab ni Evasco ang kamot ni BM Alexie Tutor. Kon mahimo kini ni Evasco, mahimo sab kini ni Inday Sara, di ba, panapos nga subli sa dumadapig ni Yap.
Gibaniog na ang balita nga mobalik sa Bohol si PRRD karong Abril 30.
Matod pa sa balita, moanha si PRRD sa Bohol isip panapos nga kampanya sa Visayas og suporta sa kampanya ni kanhi CabSec Jun Evasco og sa iyang grupo.
Nag-leg work na ang mga ahensiya sa gobierno nga gitahasan sa pagpakita sa mga mehoras gikan sa kagamhanan.
Madayon ba gyod kini, dihay nangutana.
Sa pagka-karon, madayon gyod sanglit mao man kini gisulti sa PMS. Apan dili pa matagna kon wala bay mga kausaban nga mahitabo gikan ugma og sa mga mosunod nga mga adlaw.
Sa mga dumadapig ni Evasco, dako kaayo og epekto sa kampanya kon mobisita si PRRD og balik unya iya iklaro ang iyang suporta kang Evasco pag-usab.
Dako usab kini og epekto sa kampanya ni Yap sanglit kadaghanan sa mga botante sa Bohol, init pa man kaayo ang suporta ni PRRD og dili kini magmakuli pagsuporta sa kandidato nga suportahan ni PRRD.