GI-AGHAT sa tinugyanan sa YouthWorks PH ang tanang mga kabatan-onan nga pahimuslan kini nga kahigayonan diin libre nga training, dunay allowance ug dako pa ang kahigayonan nga makatrabaho.
Nasayran nga ang maong programa gipaluyohan kini sa YouthWorks PH, usa ka development project sa United States Agency for International Development ug Philippine Business for Education ug nagpahigayon og pinaka-una nga recruitment activity sa siyudad sa Cagayan de Oro kauban usab niini ang Oro Geometric Builders Inc. niadtong Abril 8 sa CdeO-Technical Vocational Institute campus sa Barangay Agusan.
Ubay-ubay usab ka mga kabatan-onan ang nahidangat sa maong kalihokan aron nga mapahimoslan kining maong programa ilabi na sa mga wala nakapadayon sa pagtungha sa kolehiyo.
Sama na lamang ni Lara Mae Sabanto, 17, nigradwar sa high school sa Bugo nga buot usab nga molakip niini nga programa aron madugangan ang skills.
Nag-aghat usab ni Karol Mark Yee, chief of party sa YouthWorks PH, nga pahimoslan kini sa mga kabatan-onan sa siyudad gumikan kay dako kaayo kini nga tabang.
“Libreng pag-aaral, may allowance pa 75 percent of minum wage, naka training ka na may allowance ka pa magkakatrabho ka pa in the future, sali na kayo,” matud ni Yee.
Gidugang pa niini nga kini ang pinaka-una nga programa dili lamang sa Mindanao apan sa tibuok nasud.
Nasayran nga kini nga programa molungtad sa tulo ka bulan diin libre nga training ug duna pay allowance, diin dako pa usab ang posibilidad nga makatrabaho gyud dayon ilabin na kung maayo ang performance. Anaa matud sa 50 ka mga slots ang ilang gi-andam apan kung mas daghan pa nga kabatan-onan wala kini problema tungod ila kining pangitaan og paagi nga ma-akomodar.
Tumong usab matud niini ilabi na nga gipanghingusgan kini sa lokal nga kagamhanan dili lamang aron nga maka-eskwela apan aron nga matabangan nga makatrabaho ang mga kabatan-onan human sa libreng training.
“Ang atong tumong ani nga ang atong out-of-school youth dili lang maka-eskwela kundili ma employed automatically after sa ilang pag-eskwela,” matud ni Kagawad John Michael Seno, tsirman sa komitiba sa youth.