WALAY hunong ang pagpangdakop sa kapulisan niadtong mga tawo nga nalambigit sa ginadili nga druga sa Misamis Oriental.
Ang Opol Police Station miresponde sa tawag sa mga residente human namatikdan ang presensya sa tulo ka mga lalaki nga nagsuyop sa gitouhang shabu sa kasagingan nga bahin sa Barangay Barra, lungsod sa Opol.
Sapon sa akto mao sila si Retchie O. Tagana, 32; Roger S. Yugto, 42; ug wilbert E. Abantao, 32, pulos residente sa susamang dapit.
Narekober sa ilang posisyon ang nagkadaiyang illegal drug paraphernalia nga gamit sa pagsuyop. Nagtingkagol na sa prisuhan ang tulo karon panahona.
Mikasa sab og drug bust operation ang Gingoog City Police Station nga miresulta sa pagkasikop sa 21 anyos nga giilang si Ando Tabiling.
Napalitan kini sa drug bust operation ug usa ka pakete sa gitouhang shabu.
Taod-taod na usab kining gimonitor ug kumpirmado ang iyang pagpayuhot sa ginadili nga druga.
Samtang ang El Salvador Police Station, kauban ang Philippine Drug Enforcement Agency-Northern Mindanao, nipahigayon sab og drug bust operation sa Barangay Molugan nga miresulta sab sa pagkasikop ni Ritchie Rayon, 31, ug anaa gyod sa listahan sa gapayuhot sa ginadili nga druga.
Narekober sa iyang posisyon ang usa ka pakete sa gitouhang shabu nga napalit sa nagpatoung buyer.
Ang mga dinakpan karon panahona ang pulos gikatakdang mag-atubang og kasong kasupakan sa Republic Act 9165 kon Dangerous Drugs Act.