GIKATAW-AN lamang ni Cagayan de Oro Mayor Oscar Moreno ang nikatap sa social media nga ika-10 kini sa labing adunahan sa nasud.
Matud ni Moreno nga dili kini angay tumpangan tungod wala kini kamatuoran diin gitumbok niini si Jose Gabriel “Pompee” La Viña, kinsa iyang kaatbang pagka-mayor sa siyudad sa Cagayan de Oro ug kini desperado na.
“That’s fake news only. Pompee La Viña is capable of doing that. Pasagde nalang siya, mao man iyang kalaki. Diha siya maayo. Anugon ang iyang talento nga diha sa fake news, diha sa pangguba, diha ang iyang abilidad gipakita. What a waste of talent, anugon,” matud ni Moreno.
Gidugang pa niini nga di nalang matud kini tumpangan gumikan kay desperado lang matud kini.
Nigawas sa social media nga gi-post sa usa ka Facebook user ngadto sa Ang Baruganan nga Facebook page usab anaa sa ika-pulo ang ngalan ni Moreno nga dunay $2.5 bilyones nga net worth sa tuig 2017 ug $52.6 bilyones sa tuig 2018 diin gi-ilisan ang ngalan nga si Andrew Tan.
Samtang sa laing bahin, nagpasalamat usab si Moreno human nga nigawas sa poll sa SunStar Superbalita nga nag-una kini batok kang La Viña nga dunay labaw nga mga 600 ka boto gikan sa mga followers sa Superbalita Cagayan de Oro.
“Kalooy sa Diyos salamat sa katawhan no, dili man kana nimo makuha sa pangguba diha kana sa pag-build tungod kana sa serbisyo nga atong gihatag sa katawhan,” pahayag niini.