MENSAHE sa kasundalohan ngadto sa mga kabatan-onan atol sa paghandom sa ika 77 Araw ng Kagitingan o Day of Valor nga mamahimong maayo nga indibidwal ug dili gyud makiglambigit sa walhong grupo.
Gihandom sa siyudad sa Cagayan de Oro ang Araw ng Kagitingan uban sa tema nga: “Serbisyo ng Beterano ay Gunitain Gawing Tanglaw ng Kabataan Tungo sa Kaunlaran” sa El Pueblo A Sus Heroes sa Divisoria, syudad sa Cagayan de Oro.
Matud ni Brigadier General Tyne Bañas, assistant division commander, 4th Infantry Division sa Philippine Army, nga angay hunahunaon sa mga batan-on nga walay ihatag nga kaayuhan ang pagpakigbatok sa gobiyerno.
“Ang kabatan-onan mao nay market nila, mao na ila gi-recruit para madugangan ang ilang manpower. Ang atong mensahe sa kabatan-onan ayaw gyud apil-apil sa New People’s Army kay kadaotan ang ihatag ana nila,” matud niini.
Gidasig ni Bañas ang mga batan-on nga motuman sa balaod lakip na sa ilahang mga ginikanan ug magtutudlo aron mamahimong maayong tawo, diin pinaagi niini dako kini og matabang sa gipangandoy sa kalinaw sa nasud.
“Ang sa youth naa tay permanente nga rules as a citizen, sunod sa parents, sunod sa authorities, sa balaod sa teachers, maayong citizen kana ang pinaka simple para sa youth para maging magiting maski gamay nga pamaagi, they can contribute being a good citizen, being a good Filipino,” dugang niini.
Samtang gibutyag ni Retired Colonel Roger Serquiña, VFP district president ug regional vice president sa Northern Mindanao ug usa ka beterano, nga ang paghandom sa Araw ng Kagitingan mao ang pagpahinumdon sa mga batan-on nga wala masayod sa gihimo sa mga beterano nga pakigbisog.
Ang maong kalihokan gipangulohan ni Mayor Oscar Moreno, kinsa mibutyag nga kini nga mga kalihokan espesiyal sa ilang pamilya gumikan kay ang igsoon sa amahan lakip sa Death March sa Bataan.
Ang Araw ng Kagitingan mao ang panahon sa World War II diin gisakop ang nasud sa mga Hapon, ug mas ilado sa Bataan Death March nga kapin sa 70,000 ang nangamatay sa kadalanan nga mga kasundalohan tungod sa kagutom, ka-uhaw ug kasakit samtang nagbaklay.