NAKO bag paitoy-itoy lang gihapon si Digong sa mga pikot. Kana gyud ang baruganan sa usa ka lider sa nasod. Mangisog kon hanaan pagyatak ang soberanya.
Husto ang gipalanog ni Pamuno Duterte nga di lang gyud hilabtan sa China ang Pag-asa island nga anaa sa Kalayaan group nga atong gi-okupar sa 1974.
Kay kon hilabtan, iyang mandoan ang mga sundawong Filipino didto sa paghimog suicide mission paglaban sa soberanya sa nasod.
Namonitor man gud nga adunay 275 ka mga bapor nga nagbahis-bahis og tuyok sa isla sa Pag-asa nga gituohan nga kabahin sa Chinese militia.
Nagpakita kini nga may laraw ang China sa pagsakop sa isla. Nagpaantaw-antaw ang mga bapor agig pasidaan sa ilang pag-angkon sa isla.
Usa ka pagpanghulga sa atong mga sundawo didto sa pag-ariya sa dapit aron di mahiagom sa ila unyang pagsulong sa isla. Tin-aw nga mao kini ang gipasabot.
Sa tuig 2016 diin diha na si Digong ang International Arbitral Court nibasura sa pangangkon sa China sa tanang isla sa Spratley.
Gawas sa Pilipinas lima ka mga nasod ang nag-ilog sa pangangkon sa mga isla sa Spratley nga mao ang China, Vietnam, Taiwan, Brunei ug Malaysia.
Sa Spratley anaa ang Kalayaan islands ug ubang isla sa South China Sea. Nahibawo ang China nga may multi-billion gas reserve ilawom sa maong kadagatan.
Kon simbako mahitabo ang gubat di mabalaka ang Pilipinas tungod sa Defense Treaty tali sa atong nasod ug Estados Unidos.
Mituo ko nga dunay standby authority ang White House nga motabang dayon nga di na mananghid sa kongreso kon moatake ang China sa Pilipinas.
Sayri Kini. Kongrats kang Robert Cabrera sa NFA-Cebu sa 6th B-day anibersaryo sa iyang eldest apo nga si Anekha Blair J. Cabrera. Sanay higala!