MASAYRAN nato kon unsa ang kalidad sa atong mga kandidato base sa pagsunod sa yano nga lagda sa Commission on Election (Comelec), sama sa pagbutang sa ilang campaign materials ngadto a common poster areas ug dili bisan asa labi na sa kakahoyan ug poste sa kuryente lakip sa paglimit sa gidak-on niini. Apan saksi kitang tanan nga namulak ang palibot sa election campaign materials.
Hinuon, kadaghanan sa maong mga materyal gipapilit sa ilang mga dumadapig o binayrang mga suluguon. Apan siyaro og wala sila makahatag og tukma nga mando sa pagkaylap sa ilang posters? Sa laktod, nagsamin kini sa ilang pagtawo. Nasukwahi sa panultion: “Ang maayong lider, maayo usab nga sumosunod.” Kon dili makasunod sa yanong lagda, unsa na kaha sa ubang bug-at ug hugot nga gidili sa Comelec sama sa voting buying ug uban pa?
Niadtong Lunes, Abril 8, ang Comelec nilusad sa dungan nga Operation Baklas sa tibuok nasod. Grabe kadaghan ang ilang natangtang nga campaign materials. Dili lang sinako apan pipila ka truck ang gikargahan sa ilang natantang nga materyal sama dinhi sa dakbayan sa Sugbo ug ubang bahin sa Metro Cebu. Unsa na kaha sa Metro Manila ug ubang dagkong dakbayan sa nasod?
Walay mapili sa mga kandidato?
Si Atty. Marchel Sarno, election officer sa south district sa dakbayan sa Sugbo, niingon nga sama sa ilang nakita nga tanang lokal nga kandadito, nasyonal ug partylist dunay daghang posters nga gipapilit gawas sa common poster area. Gani, wala nila mahuman ang pagpanantang hinungdan nga molusad og laing mas lapas nga operasyon.
Imbes motutok sa mas undanong pagpangandam sa eleksiyon karong Mayo 13, dugang trabaho kini sa Comelec, usik sa ilang panahon ug salapi. Yano lang unta kini nga lagda apan bug-at nga basihanan sa pag-ila sa maayong kalidad sa kandidato nga angay natong pilion nga lider. Kinsa kadtong wala magpataka og butang sa ilang campaign posters? Aw, siya na.