Isports kontra bisyo

MGA children-in-conflict with the law (CICL) ang gihatagan og dakong pagtagad sa advisory council ug Talomo precinct karong summer, sa gilusad nilang Sports Festival nga gisalmutan sa tanang barangay sa dapit.

Inisyatibo sa Talomo Police Strategy Management Unit (Talomo PSMU) ka-partner ang Advisory Council sa pagpanguna ni Maria Lita Montalban, ang aktibidad nagtumong nga makamugna og camaraderie sa gatusan ka mga CICLs nga sakop sa Talomo pinaagi sa isports.

"This is in collaboration with all the barangays sa Talomo. Moduwa ta aron makakita og amigo, para sa atong health, malikay ta sa bisyo," ni Montalban atol sa paglusad sa proyekto, Abril 7 ning tuig.

Sa temang "Active Sports Involvement: Gateway to Enhancing Children in Conflict with the Law CICL/Out of School Youth's Perseverance and Camaraderie Away from Drugs," gilantaw nga anaa sa halos 300 ka CICLs ang mopakita'g aksiyon sa Sports Festival nga motuyok sa nagkadaiyang barangay nga sakop sa Talomo police.

"Dili pa uwahi ang tanan. Kung may kamalian man kitang nahimo, atua ni ma-korek. Ayaw mo og sundog sa uban. Magbag-o ta, di ta mohimo og dautan. Maglingaw-lingaw ta sa atong kaugalingon pinaagi sa isports," pagdasig sab ni Talomo Police Precinct Station Commander Police Major Roland Lao ngadto sa mga kabataan.

Aron mas madasig ang mga partisipante si Montalban nagtagana og premyo ngadto sa mga tim ug players nga mopakita sa maayong gawi, sama sa Most Behave Team, Complete Attendance, Most Respectful, Most Valuable Player (MVP) ug uban pa.

Mipasalig sab si Montalban nga bansayon ang mapiling 15 ka magduduwa aron mahimong representante sa Talomo PNP panahon og may liga.

Gidugang sab ni Lao nga ang pagmugna og samang programa usa sab sa gihingusgan sa DCPO.

"Memo sa tanang stations maghimo sama ani nga activity for CICL aron maiwasan ang riot, establish camaraderie."

Edukasyon

Luyo sa paugnat sa kusog, gatusan na sab ka mga CICL sa Talomo ang nakahuman sa pagtungha inabagan sa programa sa Emar Human and Environmental College nga libreng pagpatungha kanila.

"We adopt them here sa Emars, and we entice them to be back sa school. Thankful sab ko sa DepEd kay gisuportahan nila ang atong programa," ni Montalban nga mao say pangulo sa tunghaan.

Luyo sa duwang basketball, anaa sab ang volleyball ug futsal nga gilantaw nga makahatag og dugang kadasig sa kabataan nga mahimong produkto ang ilang summer.