Babae, 59, gilo-ok patay sa iyang bana

CEBU. Nahinabi ni Police Captain Dexter Basirgo, hepe sa Guadalupe Police Station, si Leonedes Roble pagkahuman gisikop kini tungod sa kalambigitan sa kamatayon sa iyang 59-anyos nga asawa nga si Calixta. Giangkon ra sad ni Roble ang maong salaod. (Arnold Y. Bustamante)
CEBU. Nahinabi ni Police Captain Dexter Basirgo, hepe sa Guadalupe Police Station, si Leonedes Roble pagkahuman gisikop kini tungod sa kalambigitan sa kamatayon sa iyang 59-anyos nga asawa nga si Calixta. Giangkon ra sad ni Roble ang maong salaod. (Arnold Y. Bustamante)

GIDAKOP sa Guadalupe Police Station kining usa ka 63-anyos nga bana human siya ang gitumbok sa mga silingan nga mipatay sa iyang 59-anyos nga asawa pinaagi sa paghikog niini tungod sa tumang selos sa Sitio Kamilyano, Barangay Sapangdako, siyudad sa Sugbo.

Si Leonedes Roble miangkon nga iyang gipatay ang iyang asawa nga si Calixta Roble tungod kay nasakpan niya nga nakig dulog sa iyang kompare nga iya ra usab nga silingan.

Niadtong Biyernes sa gabii, Abril 5, naatlan ni Roble nga nagdulog iyang asawa ug si Vergilio Capuli nga maoy hinungdan nga iya kining nahapak sa nawong.

Tungod sa iyang gihimo mibahad ang iyang asawa nga pasakaan og kaso nga maoy hinungdan nga nahadlok siya nga mabilango.

“Nakit-an nako na sila nga nagdulog adtong Biyernes mao to akung gipukaw, nibangon siya ug nidagan unya wala na nako maapsan kay dili na man ko kaayo kadagan, ingnan nako nga 'Day, ayawg dagan kay nagdulog man mo.' Mao to dili na siguro makigdug, mao to mi dagan” matod ni Robles sa pakighinabi sa mga tigbalita.

Matod pa ni Robles, sa tantong dagan sa iyang asawa,napangko ang tuong nawong niini sa semento diin siya ang gipasanginlan nga misukmag ni Calixta.

Human niadto mibahad na ang asawa nga dayonon na niini ang pagpakig-ipon sa iyang kompare ug ipapriso siya niini tungod sa iyang gihimo nga pag sukmag sa iyang nawong.

Pagka Lunes sa gabii, Abril 8, nakahukom siya nga iyang patyon ang iyang asawa aron dili mapunta sa lain.

Gisulod niya ang balay mga pasado alas 11 sa gabii niadtong Lunes ug iyang gipukaw iyang asawa.

Sa dihang nakamata na si Calixta, daling gibitik mo Roble ang liog sa iyang asawa gamit ang pisi nga iyang dala ug gi tuok niya kini.

Wala niya buhii hangtod nga wala na kini gininhawa ug patay na ug gisunod dayon niya ang paghikot sa pisi sa kanto sa katre niini.

Dali siya nga misibat human sa hitabo paingon sa iyang balay nga nahimutang pipila lang ka metros gikan sa balay sa iyang asawa.

“Kung dili nako buhaton ipa priso man ko niya, aron dili siya mapunta didto sa lain tablahon nalang, dili siya maakoa dili pud siya mapunta didto,” matod ni Roble.

Apan ang anak sa suspetsado nga si Dionesio Roble mihimakak nga nakig dulog ug laing tawo ang iyang inahan.

Matod niya nga dugay na nga wala mag-ipon ang iyang amahan ug inahan tungod sa ka seloso niini nga maoy hinungdan sa ilang panag-away.

Gani ang iyang uyoan nga bana sa igsuon sa iyang inahan ang gidudahan pa niini nga adunay relasyon sa dihang nag uban sila nga namutos og mangga.

“Dili na tinuod oy kay gagmay pami ana, ingun ana na gyud na sila. Sige na nana silang away hangtod karon, pagka hitabo ana wala gyud mi laing gidudahan siya ra kay nagka-atubang nana sila sa barangay kay gikulata man niya si Mama,” sigon ni Dionesio.

Si Police Captain Dexter Basirgo, ang hepe sa Guadalupe Police Station, nagkanayon nga kasong parricide ang ilang ipasaka sa dinakpan human miangkon sa krimen.

Sa dihang ilang gitubag ang alarma gahapon sa kaadlawon nagtuo sila nga hikog lang ang hitabo apan sa gihimo nila nga imbestigasyon aduna silay nabantayan nga foul play.

“At first wala man ni siya moangkon sa pagdakop nato, naa may witness nga nakakita sa dihang mibiya siya sa balay sa iyang asawa, pag human sa hitabo nakit-an ni siya migawas sa balay kay ang witness duol raman sa balay sa iyang asawa,” sigon ni Basirgo.

Giangkon ni Roble nga nagmahay siya sa iyang pagpatay sa iyang asawa ilabi na nga gitulisok siya sa iyang mga anak apan wala na siyay mahimo gawas sa pagpangayog pasaylo.(AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph