ORMOC City- Nadaut nga karne nga giluto nga pork curry ang hinungdan sa pagkalanag sa 70 ka mga partisipante sa Eastern Visayas Regional Athletic Association (EVRAA) 2019.
Kini ang resulta sa pakisusi sa Ormoc City Health Office human madala niadtong Sabado sa gabii, Abril 6, ang mga atleta.
Ang mga partisipantes gikan sa Biliran diin duha niini ang trainor.
Ang mao nga mga partisipante nakasinati og pagsakit sa tiyan ug pagsuka gumikan sa giingong food poisoning.
Dali nga nipadala ang lokal nga kagamhanan og team gikan sa CHO pinangulohan ni Dr. Edmund Keirulf.
Sa 70 nga gipangdala sa tambalanan, 15 niini ang gipang admit ug nakagawas na hinuon sa miaging adlaw.
Matod ni Elsie Jaca sa CHO, ilang nasayran nga baho na ang karne nga gigamit sa pagluto sa pork curry nga gipakaon sa mga atleta.
Sa pagsusi sa taga CHO, contaminated na sa bacteria ang karne hinungdan sa ilang pagkalanag. Duna usab laing sud-an nga gisuwa pagka udto ug giinit pagkagabie ug dunay ubang sud-an nga di insakto ang kombinasyon.
Kini sama sa kombinasyon sa pork curry ubanan og paksiw, nangka ug lomi.
Giklaro sa ni Jaca nga dunay kaugalingon nga tig-andam ug tigluto sa ilang pagkaon ang Biliran ug di gikan sa Ormoc.
“Dili sab ta makaingon nga sa ilang tubig nga giinom kay bottled water ang ilang giinom,” matod ni Jaca.
Ang 70 ka partisipante duna nay medical clearance gikan sa doktor sa Biliran ug gi check usab sa doktor sa CHO aron masiguro nga luwas na sila moduwa.
Sirado na ang kaso ug gisugdan ang duwa sa EVRAA 2019 niadtong Lunes, Abril 8.