COMMITTEE on Environment gusto nga mapaminaw ang apektadong sektor sa tinguha nga pag-ban sa single use plastics sa dakbayan sa Sugbo.
Sa committee report ni Konsehal Jerry Guardo, chairman sa maong komitiba, ilang gidayeg ang maayong epekto sa maong balaudnon hilabi na sa kalikupan apan buot usab nilang madungog ang sentimento sa mga negusyante ug mga konsumidor.
Sila si Konsehal Raymond Garcia ug Eduardo Rama buot mapalabang sa konseho ang “an ordinance providing for the phase-out of single use plastic products within the territorial jurisdiction of Cebu City and for other purpose.”
Kon mapasar ang maong ordinansa, wala na unyay tugotan mga makabaligya og plastic bags, straws, styrofoam,coffee stirrers, soda water bottles, food packaging ug uban pa.
Ang public hearing ipahigayon karong Abril 30 nga tambungan sa representante sa Cebu Chamber of Commerce and Indistry, manufacturers, retailers, groceries, supermarkets, public markets, restaurants, fast food chain ug department stores.
Tuyo sa ordinansahon nilang Garcia ug Rama mao ang pagwagtang sa pagkuyanap sa plastic pollution nga maoy sagad nabara sa mga drainage system ug kasapaan. (PAC)