NING mga adlaw sa tingbakasyon, usa sa gitutokan sa kapulisan sa dakbayan sa Mandaue ang pagpanagtapok-tapok sa kabatan-unan nga posibling pahimuslan sa mga fraternities og gang recruiters.
Ang kapulisan niawhag sa mga ginikanan nga mas motagana og oras sa ilang mga anak aron dili kini daling ma-recruit sa mga nahisgutang grupo.
Makig-alayon ang Mandaue City Police Office (MCPO) sa mga barangay opisyal sa pag-monitor sa mga batan-on sa ilang mga lugar.
Kini aron mabuyag dayon kadtong mga grupo sa mga batan-on nga mosalmot og mga gang o fraternities.
Gipabantayan o magpatrolya ang kapulisan sa mga lugar nga tapukanan sa mga batan-on - maadlawan man o magabii aron di sila magamit sa dautan, sama sa pagpamiktima sa bisan unsa nga paagi.
Nipahinumdom si Police Colonel Julian Entoma, director sa MCPO, nga ipahigayon ang summer party, sa pagsiguro nga likayan ang paggamit sa ginadili nga drugas ug nga di magpalabi sa ilimnong makahubog.
Tambag ni Entoma nga ning bakasyon, maoy labing haum nga oras nga mas motutok ang mga ginikanan sa ilang pagsubaybay sa mga lihuk sa anak.
Ila-ilahon ang mga kuyog niini ug kinahanglan kahibawo sila sa mga kalihukan sa anak.
Ang insaktong paggiya, paghatag og panahon ug pagpakita og importansya sa mga anak, ang dakong panagang nga di mahitumpawak sa bisan unsa nga kadautan ang usa ka bata.
“Kita sa mga pulis, kanunay mi nangitag paagi nga ma-protehean ang tanan. Apan kining sa mga bata, it is high time now, for us parents to realize nga nato magsugod ang pagsiguro nga luwas ang atong mga anak. Karon nga bakasyon, kinahanglan mas mag-bonding mo, aron dili mangita og comfort sa lain pa nga mga tawo ang inyong mga bata, nga mao na usahay rason nga mabutang sila sa peligro,” tambag ni Entoma.
Ang Criminal Investigation Detection Group ug Philippine Drug Enforcement Agency nitutok usab sa pagbantay diha sa mga disco area sa syudad, aron kapugngan na ang pagkuyanap sa party drugs.
Matod ni Entoma nga sa pagkakaron, ilang namaktikdan nga nangawa na usab ang mga distributor niini sa dakbayan. (FMD)