KONSEHAL sa barangay Lawaan 3 sa syudad sa Talisay ang nasikop human makuhai og mga binulto sa ilegal nga drugas ug usa ka air gun sulod sa iyang panimay sa sitio Caduldulan.
Ang mga sakop sa Provincial Intelligence Branch inabagan sa Provincial Drug Enforcement Unit sa Cebu Provincial Police Office armadog search warrant nga giluwatan ni Judge Leopoldo Cañete executive judge sa RTC Branch 60 sa lungsod sa Barili batok ni Konsehal Bimbo Cabuenas Ramos.
Alas 6:55 gahapon sa buntag, Abril 9, ilang gisulod ang balay ni konsehal Ramos ug gi siksik kini uban sa mga barangay officials nga misaksi.
Nakasakmit ang mga operatiba nga gipangulohan ni Police Captain Alejnadro Batobalonos og lima ka dagkong putos sa gituohang shabu nga motimbang ang tanan sa 500 gramos nga mobalor sa P3.4 million ug usa ka air gun nga walay permit sa PNP.
Matod ni Police Captain Batobalonos nga dugay na sila nakadawat sa impormasyon nga nalambigit sa ilegal nga drugas si konsehal Cabuenas.
Gawas sa iyang pagka lambigit sa ilegal nga drugas siya matod pa ang tago-anan sa mga drug pusher sa syudad sa Talisay ug gukdon na kini sa kapulisan.
“Naa tay information nga nadawat nga naay number 1 target nato sa Talisay nga naay pending warrant of arrest. Anha daw mo dagan sa iyang balay aron motago,” matod ni Police Captain Alejandro Batobalonos.
Dugang ni Batobalonos nga lisud sak-on ang iyang balay tungod kay nahimutang kini sa usa ka dapit nga dali ra mahibaw-an ang mo-abot sanglit gamay ang karsada.
Aron dili sila mamatikdan iyang gipasakay og motor ang mga operatiba paingon sa sulod sa compound sa dinakpan.
Gawas nga siya ang tago-anan sa mga drug pusher, gihimo usab ang iyang balay nga bodega sa shabu diin didto kuhaon ang supply kung adunay mopalit og dinagkong order.
Kaalyado usab niya si Girly Luage, ang big time drug player sa Talisay, diin didto mag-abot ang binayranay sa ilegal nga drugas.
“Actually ang iyang supplier ani kay si Girly Luage, ang atong number one most wanted sa ilegal drugs nga taga Lawaan-3 sad ni siya. Unya naa tay pending warrant of arrest ani niya at large,” nagkanayon si Batobalonos.
Ang kasayuran nga ilang nakuha gikan sa mga residente sa dapit ug mga barangay opisyal gikan sa silingan nga lugar.
Hinuon hugot nga gihimakak sa asawa sa konsehal nga iyang bana ang tag-iya sa drugas.
Nagtuo si Rowena Ramos nga adunay mga tawo nga nasuya sa ilang pamilya nga maoy hinungdan nga gidaot sila ngadto sa police.
Giangkon niya nga ang air gun gipanag-iya sa amahan sa iyang bana apan wala siya magtuo nga ilegal diay ang pag tiner sa maong matang sa armas.
“Dili gyud na tinuod sir, daghan kaayo ang naglagot niya mao nang giko-anan siya. Dili lang ko mag mention sir pero among silingan ba nga nasuya namo kay wala ko kahibawo unsay gisuyaan,” padayag sa asawa nga si Rowena.
Aduna silay gagmayng negosyo sama sa pag imprenta sa uniform sa basketball ug uban pa.
P4 million nga shabu
Samtang usa ka 16-anyos nga lalake ang nasikop sa gihimong buy bust operation sa mga sakop sa Drug Enforcement Group-7 nga gipangulohan ni Police Lieutenant Colonel Glenn Mayam, pasado alas 8 ang takna sa gabii niadtong Lunes, Abril 8, sa C. Padilla street, Duljo Fatima sa syudad sa Sugbo.
Nakuha sa dinakpan ang 600 grams nga gituohang shabu nga mobalor ang tanan og P4 Million nga giangkon sa suspek nga gipadala lang kaniya.
Nakadawat ang DEG-7 og impormasyon nga ang maong batan-on maoy mobaligya sa ilegal nga drugas. Human masuta nga positibo ang impormasyon nakig-alayon dayon sila sa Mambaling police station aron mapahigayon ang buy bust operation.
Mitug-an kIni nga igo ra siya nga sugoon ug suholan sa paghatod sa supply.
Aduna siyay gitug-an nga pangalan nga si Raven Donza nga nadakpan sa miaging buwan nga nakuhaan ug lima ka kilos nga shabu nga mobalor sa P30 Million.
Tungod sa maong kasayuran adunay himuon nga follow up operation ang kapulisan sa mosunod nga mga adlaw.
Kasamtangan nga gi turn-over ang dinakpan sa Operation Second Chance diin didto ipamutang kadtong mga menor de edad nga makahimog salaod.
Drug Den
Samtang pito ka mga personalidad ang nasikop sa mga sakop sa Talisay City Polioce station inabagan sa Philippine Drug Enforcement Agency 7 human maaktohi nga nanuyop sa usa ka drug den sa barangay San Isidro, syudad sa Talisay niadtong Lunes sa hapon, Abril 8, lakip na ang nag padagan sa drug den.
Ang mga nadakpan giila nga silang Jonathan Pantonial nga maoy drug den maintainer, Nestror Cabusas, Roland Dapiton, Shalimar Campo, Justine Gelido, Jiber Cabusas ug Miliam Labandero.
Nakuha sa mga sakop sa Talisay City police station ug PDEA-7 operatives ang napulo ka pakete sa gituohang shabu nga motimbang sa 88 gramos nga mobalor kinig P88,000.
Ang kapulisan nakadawat og report gikan sa mga residente sa dapit labot sa paghitak sa ilegal nga drugas ug didto ra suyopon sa balay nga gihimong drug den nga iya ni Pantonial.