MOABOT og 34 ka mga samad dinunggaban ang naangkon sa 14 anyos nga dalagita, kinsang lawas gilabay sulod sa septic tank sa Barangay Cogon, Danao City, amihanang Sugbo.
Gikompirmar ni Philippine National Police (PNP) Crime Laboratory medico legal officer Dr. Benjamin Lara nga di mabdos si Tesa Marie Ygay sukwahi sa nanggawas nga mga tabi-tabi nga tulo ka buwan nga mabdos.
Ang lawas ni Ygay gi-autopsy sa Pampagueña Memorial Homes, Pajac, Lapu-Lapu gihulagway ni Lara nga nadugta.
Iyang gibana-bana nga kapin na sa 72 ka oras nga patay si Ygay una napalgan.
Matod ni Lara nga si Ygay nakaangkon og 13 ka mga dinunggaban sa liog ug ulo, 11 sa iyang wala nga bukton, pito sa iyang lawas, duha sa wala nga kamot ug usa sa tuong kamot.
Mga samad sa kamot nagpakita nga nanagang o nisukol si Ygay sa suspek nga si Jessie Montes Medequillo.
Way nakitang fracture diha sa iyang ulo o bleeding sa utok.
Nipasabot si Lara nga maglisod na siya pagsuta kon gilugos ba ang dalagita tungod sa pagkadugta na sa iyang private part.
NAHADLOK
Samtang ang kabanay ni Ygay nga nagdumili sa pagpa-ila emosyonal nga nisaysay nga sila nabalaka sa ilang seguridad tungod sa bahad ni Medequillo.
“Isunod (patay) lagi kuno ang papa (Felimon Enoy). Mahadlok gyud mi kay armado man to siya (Medequillo),” matod sa kabanay sa mga tigbalita.
Gawas nga giupawan ni Medequillo ang biktima, adunay higayon nga gisunog pa niini ang mga sinina ni Ygay sa kasuko sa paglaag sa dalagita.
Ang maong insidente gipa-blotter sa kapulisan.
Katapusang nakit-ang buhi si Ygay niadtong Marso 31 sa balay sa iyang paryente sa Barangay Ibo, Lapu-Lapu.
Matod sa kabanay nga gipadamgo ang amahan niiini nga Felimon nga giingong nagkanayon: “Sakita na lagi, Pa.”
MANHUNT
Ang Danao City police station way hunong sa pagpangita kang Medequillo.
Matod ni Police Lieutenant Colonel Maribelle Getigan, hepe sa Danao City police station, nga ila nang gitumbok si Medequillo, 34, nga suspek na sa linuog nga krimen.
Kagahapon sa kaadlawon, Abril 9, ilang giadto ang balay niini sa Tuburan Sur, Siyudad sa Danao, apan giingong nagkabaiwas ra sila niini.
Apan nagduda si Getigan nga naa pa kini sa maong syudad nag tago-tago.
“Karon, Sir, ongoing ang atong hot pursuit operation. So, nag-start na pud ganiha mga alas 2 sa kaadlawon paglakaw ang atong kapulisan. Unya ang resulta, Sir, nagkabalikwas ra gyud. Actually naa pa siya sa area eh. So, gi-utilize na pud nato ang community nga kon pwede mohatag silag information as to whereabout of the suspect,”awhag ni Getigan sa publiko.
MIGASTO
Sukad pa sa nagpangidaron og 9 anyos si Ygay, giingong si Medequillo na ang migasto sa pagpatungha niini.
Kanunay kini nga dalhon sa suspek sa trabaho kon mo-duty panahon sa kagabhion.
Didto sa guard house sa tunghaan pakatulgon.