SECTIONS
Monday, September 16, 2019
SUPERBALITA CEBU

‘Killer’ ni Silawan miangkon

CEBU. Gibutyag ni Police Brigadier General Debold Sinas, hepe sa Police Regional Office 7, nga niangkon ang bag-ong suspetsado sa pagpatay ni Christine Lee Silawan nga siya gyud ang nipatay sa maong dalagita. Matod pa ni Sinas, ang maong suspetsado "obsessed" ni Silawan human nila nagkaila sa social media. Ang pangan sa maong suspek wala pa gibutyag sa mga kapulisan sukad nasikop ni niadtong Martes, Abril 9. (Sunstar file photo)

NIANGKON ang 43 anyos nga lalake nga nadakpan sa kapulisan sa Dakbayan sa Lapu-Lapu niadtong Martes sa buntag, Abril 9, nga siya ang nipatay kang Christine Lee Silawan niadtong Marso 10.

Sa reenactment sa krimen nga gisubay sa usa ka sibyaanan sa telebisyon sa Miyerkules sa buntag, Abril 10, ang suspek niasoy sa kinatibuk-ang hitabo sa pagpatay niya kang Silawan.

Gawas sa iyang pag-angkon, ang kapulisan nakakuha na og mga ebidensya batok kaniya, lakip na ang close circuit television (CCTV) footage nga nakita siyang naglakaw uban kang Silawan sa mao nga petsa ug oras sa wa pa patya ang dalaga.

Apil sa mga ebidensya mao ang text messages ug chat sa Messenger tali sa suspek ug kang Silawan.

Sa Miyerkules sa hapon, gipasakaan og kasong kalapasan sa Commission on Elections (Comelec) ang 43 anyos, minyo, taga sityo Tigcahon, Brgy. Bankal, Dakbayan sa Lapu-Lapu human siya nakuhaan og kalibre .45 nga pistola sa kapulisan.

Ang ngan sa suspek gipugngan una ning mantalaan tungod sa hangyo sa prosecutors samtang wa pa mapasaka ang kaso nga may kalabutan sa pagpatay kang Silawan.

Watchlist

Sa pamahayag ni Mayor Paz Radaza atol sa regular press conference niadtong Miyerkules, base sa impormasyon gikan ni Lapu-Lapu City police director Police Colonel Limuel Obon, nalakip sa ilang drugs watchlist ang suspek.

Nitumaw usab ang ngan niini sa Special Investigation Task Group (SITG) Silawan nga usa sa mga persons of interest sa kaso.

Usa ka tinubdan nga nasayod sa operasyon apan nihangyong di nganlan, niingon nga ang suspek nisibat human masayri nga nitumaw ang iyang ngan sa imbestigasyon.

Apan nasayran sa kapulisan nga niuli kini sa ilang balay kay gimingaw sa anak.

Tungod kay naa sa drugs watchlist, ang kapulisan nakahukom sa pagpahigayon gilayon og buy bust operation niadtong Martes, Abril 9.

Sa pag-abot sa kapulisan sa balay sa suspek, ang poseur buyer niduol aron kunohay mopalit og shabu.

Apan nakit-an sa poseur buyer nga naa kini pusil, hinungdan nga nisinyas sa iyang mga kauban sa pagdakop sa suspek.

“Sa tantong istorya-istorya, ni-confess man kuno na siya (suspek) sa pagpatay ni Christine,” butyag ni Radaza sa mga tigbalita.

Giingong gihamok sa iyang tanlag ang suspek hinungdan sa iyang pagtug-an.

Miangkon

Sa GMA 7 Balitang Bisdak report sa Miyerkules, Abril 10, ang suspek nisulti sa mga pulis nga iyang giangkon ang krimen tungod kay siya nakonsensya.

“Wala ko gipressure. Sukad pagkadakop nako, nakonsensya gyud ko sa gibuhat nako. Dili lang sa kang Christine, kundi bisag sa katong bata (18 anyos nga naa karon sa custody sa Dakbayan sa Lapu-Lapu) nga gidakop sa NBI nga wala man toy sala. Grabe gyud nako kasalbahis,” sulti sa suspek ngadyo sa mga pulis atol sa reenactment.

Ang 43-anyos nigiya sa personnel of the Lapu-Lapu City Police Office (LLCPO) pinangulohan ni Police Colonel Limuel Obon kon giunsa niya paghimo ang krimen.

Mga alas 7 sa buntag sa Miyerkules, inabagan sa iyang abogado, nigiya kanila ni Obon ug mga ginsakpan sa Sacred Heart Parish sa Barangay Pajac.

Giasoy sa suspek nga naghuwat siya kang Silawan gawas sa simbahan mga alas 6 sa gabii sa Dominggo, Marso 10

Matod niya nga sa wa mobiya si Silawan sa simbahan, iyang giteksan makadaghan si Christine kay gusto siyang iyang kuyogan sa pagpauli.

Apan wa siya bawsi, dihang si Silawan nigawas sa simbahan, gisugat siya sa suspek ug iyang gitanyagan nga kuyogan sa pag-uli.

Apan nagdumili si Silawan kay makigtagbo siya sa iyang kanhi uyab.

Matod sa suspek nga niinsister siyang ihatod si Silawan sa balay ug samtang sila naglalis, naglakaw sila padung sa Sityo Mahayahay, Brgy. Bankal.

Samtang sila naglakaw, iyang gigamit ang iyang cell phone sa pag-iwag kay ngitngit ang dapit sa sityo Mahayahay.

Sa ilang pag-abot sa crime scene, ang suspek niingon nga kalit niyang gihangyo si Christine nga sila mag-sex, apan nibalibad.

Niinsister si Silawan nga mouna kay naghuwat ang iyang kanhi uyab kaniya.

Tungod sa iyang kasuko, iyang gilayog ngadto sa yuta si Silawan ug gihuboan niya sa karsones.

Matod sa suspek nga nakiglayog kaniya si Silawan, apan iyang napiog.

Gamit ang gunting nga diha sa iyang bulsa, ang suspek nidunggab kang Silawan sa makadaghang mga higayon hangtod nga siya namatay.

Wa na niya dayuna ang iyang plano sa paglugos kang Silawan kay patay na kini.

Gamit ang samang gunting, iyang gilaplap ang nawong ni Silawan. Iyang gikuha ang nawong ni Silawan ug mga butang dayon nibiya sa dapit.

Siya niangkon nga nakalimot siya kon diin niya gilabay ang nawong ug mga butang ni Silawan tungod sa kahadlok.

Niadto siya sa silingang sityo diin iyang gihugasan ang dugo sa gunting sa usa ka atabay.

Nasayod siya sa dapit kay nagpuyo siya kaniadto sa dapit.

Naibog

Si Police Regional Director General Debold Sinas sa interbyu sa mga tigbalita, niingon nga naila usab nga mangilad og mga batan-ong babaye sama sa pangidaron ni Silawan ang suspek aron iyang pahimuslan ang pagka babaye.

Giingong naibog kini pag-ayo kang Christine Lee sa dihang nagka ila sila sa social media.

“Personally during initial interview, obsession with the girl. Obsessed siya sa babaye. Kahibalo siya sa babaye. Kaila siya sa babaye. Ang babaye nakaila niya thru exchange sa text and messenger mao among na kuan,” matod ni Sinas.

Sa Biyernes, Abril 12, gitakdang ipasaka na ang kasong murder sa korte apan giasikaso pa nila ang mga ebidensya.

Sa wa pa siya masikop nakita na siya sa mga CCTV footage nga nakuha sa mga pulis sa Lapu-Lapu ug didto nailhan ang iyang pagka tawo. (AYB, JKV, FVQ, FMD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph