NAGPADALA nag "Tracker Team" ang Police Regional Office 7 sa siyudad sa Danao aron mogukod sa prime suspect sa kamatayon ni Tesa Marie Ygay sa Barangay Cogon Cruz niadtong miaging adlaw.
Ang naglangkob sa tracker team mao ang Regional Intelligence Division, Cebu Provincial Police Office ug ang Danao City Police Station.
Matod ni Police Brigadier General Debold Sinas, hepe sa PRO 7, nga ila nang gi-publikar ang panagway ni Jessie Montes Medequillo aron matabangan sa publiko ang pagpangita niini.
Wala sila mo kompyansa sanglit gi konsidera nila si Medequillo nga armed and dangerous tungod kay usa kini ka gwardya.
Pahimangno niya sa publiko nga kung ila kining makita mahimong mo taho sa labing duol nga police station ug dili ikomprontase ang suspek tungod sa posibilidad nga mosukol kini nga mahimong ika peligro sa ilang kinabuhi.
Tanang lugar sa siyudad sa Danao nga mahimong iyang gitagoan gi-monitor na sa tracker team aron masikop kini sa labing dali nga panahon.
Mimando si Sinas sa hepe sa Danao City Police Station nga kung aduna na silay ebidensya, mahimong ipasaka na kini ang kaso sa korte.
Ang mga dugo nga nakuha sa guard house ug ang giingong kutsilyo nga posibling gigamit sa pagpatay gipaubos na sa DNA test sa Philippine National Police (PNP) Crime Laboratory.