GIKLARO ni kanhi Philippine National Police (PNP) chief Ronald “Bato” Dela Rosa, kinsa magpapili pagka senador sa nasud, nga dili degrading ang bag-ong tawag sa mga Police Officer (PO) 1 nga mga patrolman.
Nihatag og reaksyun si Dela Rosa nga kining pag usab sa PNP rank classification atol sa 2019 Campaign Caravan sa Gingoog City, diin kauban niini ang laing mga magpapiling senador.
Matud ni Dela Rosa nga usa siya kaniadto sa nangusog nga pulihan ang ranking classification sa kapulisan nga ipareha na sa mga sundalo.
Dugang ni Dela Rosa nga siya nihangyo kang Presidente Rodrigo Duterte nga tabangan nga mabalik sa military rank ang mga pulis tungod kanunay sila maalaan nga school superintendent ug bus inspector.
“Unsa man tawon naka degrading ana? Kung PO1 ka unya nagapatrolya ka e di patrolman ug patrol woman tawag nimo, taga patrol ka,” dugang ni Bato.
Ang mga mosunod mao ang bag-ong rank classification sa kapulisan.
Gikan sa Director General ngadto sa Police General; Deputy Director General ngadto Police Lieutenant General; Director ngadto Police Major General; Chief Superintendent ngadto Police Brigadier General; Senior Superintendent ngadto Police Colonel; Superintendent ngadto Police Lieutenant Colonel; Chief Inspector ngadto Police Major; Senior Inspector ngadto Police Captain; Inspector ngadto Police Lieutenant.
Samtang ang Senior Police Officer IV ngadto sa Police Executive Master Sergeant; Senior Police Officer III ngadto Police Chief Master Sergeant; Senior Police Officer II ngadto Police Senior Master Sergeant; Senior Police Officer I ngadt Police Master Sergeant.
Ang Police Officer III ngadto Police Staff Sergeant; Police Officer II ngadto Police Corporal; Police Officer I ngadt Patrolman ug Patrolwoman.