PATAY na pag-abot sa tambalanan ang duha ka maghigala human nabangga ang gisakyan nga motorsiklo ngadto sa usa ka pick-up truck niadtong alas 11:40 sa gabii Martes, Abril 9, sa Barangay Molugan, dakbayan sa El Salvador, Misamis Oriental.
Si Police Senior Inspector Princess Joy Enriquez, tigpamaba sa Misamis Oriental Provincial Police Office (Moppo), niila sa mga biktima nga sila si Rodel Lamantucan, 31, taga Cagayan de Oro ug angkas niining si Glecerio Baja, 51, lumad nga taga probinsya sa Bohol.
Sa inisyal nga imbestigasyon sa El Salvador City Police Station, sakay kining mga biktima sa motorsiklo niadtong gabhiona ug padulong ang direksyon sa dakbayan sa Cagayan de Oro.
Ang pick-up nga nagdala sa plaka FON 001 gimaneho sa tag-iya nga si Kirt Pacana, nga paingon ang direksyun sa dakbayan sa Iligan.
Apan matud ni Enriquez nga kining motorsiklo nakita sa mga nakasaksi nga mi-overtake sa usa ka trailer truck ug sa pag-overtake, didto miabot sa pikas linya, dalan sa pick-up hinungdan sa pagkabangga.
Tungod sa kusog nga impact, dili tiaw ang naangkon nga kadaot sa lawas sa mga biktima.
Miresponde og dali ang City Disaster Risk Reduction Management Team ug gidala ang mga biktima sa El Salvador Medical and Lying in Center apan ang duha pulos nakabsan sa ilahang kinabuhi.
Ang driver sa pick-up anaa karon ubos sa kustdiya sa El Salvador Police Station.
Dili pa masuta ni Enriquez kon hingpit ba kining pasakaan og kaso sa mga kabanay sa duha ka biktima o adunay amicable settlement nga matigayon tali sa duha ka parte.