Tambagi ko Noy Tikyo: Love pa ang ex

DEAR Noy Tikyo,

Maayong adlaw. Salesgirl ko sa usa dakong mall dinhi sa Davao, duna nay kapuyo ug naay dunay usa ka anak.

Ang akong problema di bahin sa akong kapuyo kon di bahin sa akong kanhi uyab. Nagsabot na unta ming magminyo kaniadto. Apan tungod kay di pa gusto sa akong ginikanan nga magminyo ko, nagkabuwag mi.

Hinuon, dali ra kong naka-move on mao nga nakaplagan ko ang akong kapuyo karon.

Apan subling gitagbo ang among mga dalan sa akong ex-boyfriend.

Dinhi na nagsugod ang akong problema. Kay kanunay niyang isulti nga nahigugma pa siya kanako kon magkita mi.

Akong angkunon nga naa sab koy gibati para niya, ilabi na nga hangtud karon ulitawo pa gihapon siya.

Apan unsaon nga duna na man koy kapuyo karon ug nagbaton na og usa ka anak?

Irish

*****

Irish,

Kon duna man moy mga kaagi kaniadto nianang lakiha, kalimti na kadto kay di na kini bililhon karon tungod sa imong kahimtang.

Bisan tuod kon nagpuyo lang mo, matawag gihapon mong minyo, ilabi na nga duna moy usa ka anak. Kuwang na man lang god ninyo ang kasal o bendisyon sa Simbahan. Nagpasabot nga magtiayon gihapon mo.

Busa putla na ang bisan unsang komunikasyon nga naa ninyo karon nianang imong ex boyfriend kay di kini makaayo sa imong pagpuyo.

Ang mas maayo nimong buhaton mao ang paglig-on sa inyong panag-uban nianang imong kapuyo pinaagi sa pagpakasal sa Simbahan. Pangayo mo og bendisyon aron nga mapanalanginan ang inyong panag-uban.

Ayaw na og i-complicate ang imong kinabuhi. Be faithful ngadto sa imong kapuyo karon ug sa imong anak.

Noy Tikyo

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph