USA ka bulan na lang mopuli na ang katawhan sa mga opisyales nga palingkuron sa 18,000 ka mga puwesto sa lokal, senado ug kongreso sa sunod nga katuigan.
Sumala sa record sa Comelec, dunay 43,000 ka mga kandidato ang magpapili apil na ang 134 ka kandidato alang sa 59 ka puwesto sa Partylist.
Sa 18th Congress, langkuban kini sa 305 ka mga magbabalaod diin gikinahanglan ang 152 ka mga Kongeresista ang magkahiusa aron pagmugna sa màjority nga modomina sa Kongreso sa pagseguro nga tunhay ang dagan sa mga bills nga ipasa ug mahimong balaod sa nasud kon maaprobahan sa ubos balauranan ug sa senado ug pagsupota sa programa sa Presidente.
Duna sab 63 ka mga kandidato ang magpapili alang sa 12 ka puwesto sa senado diin ang pipila kanila subli nga magpapili.
Kabahin sa demokratikanhon nga sistema sa gobyerno ang pagpili sa mga pangulo apan daghan ang magbagulbol human sa eleksiyon kay kuno dili angayan ang mga nakadaug sa eleksiyon. Dawat-dawat na lang ta unsay gusto sa kadaghanan.
Hingpit na ba nga nahigmata ang katawhan unsang matang sa mga lider ang gikinahanglan aron molambo ang atong nasud?
Kon atong sutaon dunay mga magpapili nga mga kritiko sa kasamtangang administrasyon nga nagaingon nga wala na ang demokrasya sa atong nasud tungod diktador kuno si Presidente Rodrigo Duterte. Kon ubos na kita sa usa ka diktador nga gobyerno wala na unta tay eleksiyon.
Naghinobra ang mga kandidato nga buot mosuporta sa programa ni Presidente Duterte samtang sa pikas kampo naa sab ang oposisyon.
Kinsa man ang atong paminawon? Alang ka ba sa kalamboan o balik ta sa naandan?
Sa mga Partylist daghan na sab ang naserbisyohan sa PBA labi na dinhi sa dakbayan sa Davao tungod sa ilang programa sa pagtabang sa katawhan alang sa edukasyon ug medical assistance.
Mao kini ang kalahian kon ang imong pilion adunay duol nga buhatan ug mga katawhan nga maduolan.
Sa akong yano nga pagsabot daghan na nahigmata nga mga botante kay nagalantaw sa kinatibok-an, apan duna pay pipila nga ikambyo ang ugma depende sa kantidad nga ilang madawat ug kon kinsa ang mitunol panahon sa eleksiyon.
Taas ang hisgutanan kon ang suheto bahin sa eleksiyon. Ubani ko kay ato ning ipadayon sunod semana samtang wala pay eleksiyon.
Ato sab iapil sa pag-ampo ang atong nasud aron magmalinawon ug molambo. Kon ugaling dili nato matagamtam sa atong panahon, unta matagamtaman kini sa sunod natong henerasyon.