DAGHAN nang nidayo karon nga mga nindot ug sikat nga suruyanan o kaha mga beaches o resorts aron nga pahimuslan ang bakasyon o summer uban ang pamilya.
Naandan nang maligo og dagat o pool tungod sa kainit sa panahon. Maayo na lang gani kay ang siyudad sa Davao, dunay nasinating mga pag-ulan.
Kay sa ubang dapit sa nasud, grabe kainit gyud. Gani didto sa Dagupan City, giingong niabot pa og kapin 50 sentigrado ang temperatura niadtong adlaw nga Martes.
Busa aron nga makubsan ang kainit sa panahon, nindot kaayong ikaligo, ilabi na gyud sa mga busay.
Apan samtang naglingaw-lingaw kita, angay natong di kalimtang ang atong seguridad. Kinahanglan nga kanunay kitang mag-amping aron nga mahingpit nato ang atong bakasyon, ilabi na gyud sa kabataan.
Kay matud nila, di baya gyud mahibaw-an ang disgrasya.
Naa sab ang giingong hulga sa mga dautang tawo nga posibleng mopahimulos sa panahon.
Busa magbantay kita ug di magpasagad aron nga di kita magbasol sa kaulahian.
Kini sab ang angay nga batonan sa tanan, ilabi na nga sa sunod semana, kuwaresma na. Daghang mga aktibidad ang mahitabo sa mga nagkadaiyang Simbahang Katoliko dinhi sa dakbayan nga magsugod mismo sa Dominggo, Abril 14, ang Bendita sa Lukay.
Di kita angay nga mokompiyansa ning higayona tungod sa mga nahitabong pagpamomba sa ubang lugar dinhi sa Mindanao.
Bisan tuod kon gipaneguro sa Philippine National Police (PNP) ug Armed Forces of the Philippines nga duna na silay mga security measures nga gipatuman, apan kinahanglan gihapon kitang mag-amping kay di tanang higayon nga ila kitang mabantayan.
Gani giawhag sab sa mga awtoridad ang tabang sa komunidad aron nga mapabilin ang kahapsay ug kalinaw sa dakbayan.