NAKURAT ang Dabawenyo sa natigayong sunog Miyerkules, Abril 10, sa GMall of Davao sa dalang Jose P. Laurel, alas 4 sa hapon.
Sa post sa SuperBalita Davao FB page, ang netizens mi-comment diin ilang nalab-as ang natigayong sunog sa NCCC Mall of Davao, Disyembre 23, 2017 nga gikalas sa sobra 30 ka mga call center agents.
Sukad sa pagsuwat ning balita Miyerkules, wala pa nagpagawas og opisyal nga pamahayag ang Gmall Management ug wa pa migula ang report sa Bureau of Fire and Protection (BFP).
Apan makita sa hulagway sa netizen nga si Luiczr Labrador Uy makita nga naggikan ang aso sa dapit diin asa mao ang kusina sa duha ka sikat nga fastfood chain.
Hinuon alas 5 sa hapon human sa usa ka oras nga pagbanat sa mga bombero, gideklara nga fire under control ang maong sunog.
Atol sa hitabo, dali sab nga gipagawas ang mga tawo sa nasampit nga mall aron luwas ang tanang mall goers niadtong higayona. (Jeepy P. Compio)