MIDANGOP sa Sasa Police Station ang usa ka bana human di na niya maagwanta nga sige siya’g kulatahon sa iyang asawa nga gisama niya sa kamangtas sa tigre.
Alas 7 sa gabii niadtong Miyerkules, midangop sa Sasa PNP si Rosello (bansagon gitago), 46-anyos, ug residente sa Doña Asuncion, Barangay Sasa, dakbayan sa Davao.
Saysay ni Rosello nga di na niya maagwanta ang upat ka tuig nga punay siyang kulatahon sa iyang asawa bisan gamay lamang ang rason.
Giingon sa bana nga diha’y mga higayon nga magkadugo na iyang mga panit sa kinulata sa iyang asawa, apan wala niya kini igsapayan gumikan sa iyang gugma niini ug sa duha nila ka mga anak.
Gawas sa mga bun-og, daghan na sab og mga kinarwasan ang lawas sa bana diin ang uban niini nahimo nang uwat.
Sa ulahing higayon nga gibugno siya sa iyang misis, dihang napungot ang babaye kay mihangyo ang mister og lipay-lipay ibabaw sa kama.
Apan pakyas ang mister dihang sa iyang paghangyo, higayon nga gisapot og maayo ang iyang misis hinungdan nga nabugnoan siya.
Nag-abot sila sa barangay diin didto sila gihusay, ug nagpenirmahay nga magbulag na sila, apan usa-usa sila sa ilang mga anak.
Ning ulahi lang, nasuko na gayod si Rosello dihang milayas ang iyang misis ug gidala ang ilang duha ka mga anak didto sa Tandag City, Surigao del Sur.
Naguol si Rosello sa duha nila ka mga anak kung unsay dangatan nga gidala sa iyang mora’g tigre nga awasa.