DOMINGGO. Alas onse sa buntag. Gi-U-turn nako ang among sakyanan sa tungod sa ‘skywalk’ sa Gaisano Country Mall. Kita kaayo ang karatula nga nag-ingon, NO U-TURN. Kon akoy pabut-on, adto ko ‘U-turn’ ilawom sa ‘fly over’ sa may Foodland, aron way ‘traffic violation.’ Apan ang pasahero may nagbuot! Wa ko kasupak, kay ako mang ‘Kunander.’
Gikan mi sa Mandag-um, Badian. Namisya mi didto. Sabado pa sa hapon didto na mi. Giimbitar mi sa akong manghod nga si Efren. Unya pagbiya namo humag pamahaw ganihang buntag aron mamauli sa Talamban, may gipamalihog si Efren. Duna siyay padad-ag sud-an sa Sitio Baca nga suod niyang higala nga wa katambong sa iyang hikay. Balig tulo ka tupperware nga gisulod sa ‘plastic bag.’
Gisultihan ko na daan ang akong kumander kon asa ko mo-U-turn.
“Ah, Dominggo bitaw ron, Allen! Way trapik. Wa say mananakop!” matod ni Noralyn nga tupad nako sa ‘front seat’ sa among Toyota Corolla nga abuhon.
Dominggo tuod. Daghan kong nakit-ang mga sakyanang mo-U-turn diha. Way manakop.
Apan pagkahuman gayud nakog ‘U-turn’, igong nabalik ang sakyanan padulong sa
Sitio Baca nasigpatan dayon nako ang multicab nga asul ug puti ang buhok. May tatak CITOM nga nag-parking habig sa Gaisano Country Mall. ‘Patay,’ nakatuaw ko sa hilom
Paghitungod gyud nako sa multicab may mipara dayon nga ‘traffic enforcer’. Milingi dayon ko sa kumander. Wa na lang ko magtingog aron way gubot. Diha sa akong hunahuna akong igsusulti, ‘Giingnan ta bitaw ka!”
Gipadaplin nako ang sakyanan. Giablihan ko ang bentana sa akong wala.
“Maayong buntag, Sir,” matod sa ‘enforcer’ nga matinahuron. But-anon siyag hitsura.
“Pasayloa lang ko, Sir. Dominggo man god ron. Wa kaayoy trapik. Abi sab nakog way mananakop,” matod ko.
Nahikatawa ang ‘enforcer’, “Sa ato pa, motahod lang tas balaod kon may manakop? Patan-awa kos imong lisensiya.”
Gikuot ko ang akong pitaka sa luyong bulsa sa akong maong nga purol. Gikuha ko ang akong lisensiya ug gitunol sa ‘enforcer.’
“Isyuha ta lang kag citation,” sa enforcer.
“Pila man kahay multa ana, Sir?” misukna ko.
“Wa ra,” tubag niya, dayon mikuha sa ‘stub’ sa mga resibo gikan sa iyang bulsa ug misugod pagsuwat.
Midalikyat si Noralyn og tunol ngari nako sa tibuok dos sintos pesos nga papel de banko. Iyang ipahatag sa enforcer. Gidawat nako.
“Pwedeg anha na lang namo ihatag nimo among para multa, Sir?” matod ko nga nagtunol sa papel de banko kaniya.
“Ayaw ana, Sir. Puwede baya tika arestahon, kay ‘attempted bribery’ nang imong gibuhat!” pintok nga namulong ang enforcer. Napingi na sab ko. Lisod ning wa tay kaugalingong panghunahuna. Nag-agad lang sa kumander.
Gitunol sa enforcer pagbalik nako ang lisensiya ug papel nga asul nga gipirmahan niya.
“Salamat, Sir,” matod ko nga midawat sa mga dokumento. Mitalikod ang enforcer.
Unya kalit mipalakbit si Noralyn, “Puwedeng ang ‘NO U TURN’ sign butangag ‘Monday thru Friday’ aron Sabado’g Dominggo pwede maka- U-turn?”
“Pagsuwat mo sa Hepe sa CITOM sa inyong sugyot. Working days ra man tuod nga daghang sakyanan nga mangagi dinhi. Mas maayo pa mosugyot mo, kay sa mo-suburno!” matod sa enforcer nga milingi kanamo.Sukad adto nakahukom ko nga isip drayber, ako nay magbuot asa nako iagi ang gimanehong sakyanan. (KATAPUSAN)