SI JOSE Ding Salazar natawo ug nidako sa General Santos city sa South Cotabato.
Sa edad nga 47 sama nato niagi usab siya sa mga dagkong unos sa kinabuhi.
Lakip sa iyang nakat-onan nga dili ta dapat mohukum sa atong isig katawo labi na sa kaparian nga nalambigit sa eskandalo kay di man sila ang atong gisimba kon di ang Dios nga maoy tuburan sa tanan. Iyang gihisama ni sa silhig nga “hugaw apan gamita... makalimpyo.”
Ang iyang pagtukar karon matag-adlaw isip keybordista ug singer sa Sto. Rosario Parish Church maoy iyang halad pasalamat sa Kahitas-an nga maoy nagtultol niya sa tul-id nga dalan. Aduna usab siyay mga komposisyon nga nagsalamin sa iyang kinabuhi.
Hinaot ning nagsingabot nga Semana Santa makahatag og inspirasyon ug pagtulun-an ang iyang sugilanon. Jose Ding Salazar, Ssssuper Ka!
Nganong napadpad man ka sa Cebu?
Naa man koy maguwang dire nga pulis gida ko niya dinhi mga 1996. Dinhi na ko naminyo ug nakabaton og duha ka anak.
Unsa may kinabuhi nimo kadtong naa pa ka sa Cotabato?
Grabe akong kinabuhi sa una, nagbanda pa ko, nightlife grabe... tanan halos natilawan nako. Maorag plano gyud sa Ginoo ba nga dad-on ko’g Cebu. Then three months later pag-abot nakog Cebu, dunay niagda nakog apil og charismatic renewal sa Sto. Rasario Parish. Na-twist gyud akong kinabuhi maorag 360 degrees.
Unsa may nausab sa imong kinabuhi?
Nabiyaan nako tanang bisyo. Di nako moinom, di nako manigarilyo, di na mo-chongke... marijuana ba. Wa pa may shabu sa una, drops among gamiton. Kato tanan giwagtang gyud sa Ginoo.
Giunsa man ka pag-usab sa Ginoo?
Gihatagan ko niyag sakit... sakit sa bato. Wa na koy gallbladder. Kay kadtong naa pa ko sa banda grabe gyud ko moinom... binuntagay, hard, beer bisag unsa. Pagkasakit nako diha ko nakaamgo nga naa ra diay Siya kanunay nga naghuwat ra sa atong pagbalik. Actually, duna koy mga religious songs nga gi-compose pero reggae. Puhon, maapil ni nako sa akong album.
Unsang mga kantaha?
Usa sa mga favorite nakong komposisyon akong gitaytulan og “Bisan Na.” Ang linya sa chorus: “Bisan pa ako nasayop/ imo akong gihangop/ bisan pa ikaw gilimod kanako wa motalikod/ bisan pa sa akong kahakog imo akong gibusog/ bisan pa ako nibiya imo akong gipangita.” Sa una akong feeling layo na kaayo ko sa Ginoo pero akong napamalandungan nga usa ra ka tikang atong gikinahanglan kay sa panahon nga nagpalayo ta niya, Siya diay nagsunod ra kanato, naa ra Siya sa atong luyo, nagbantay.
Na-record ni nimo sa studio?
Na-record na. Naa sad koy composition nga ininglis. Ang title kay “Mr. Mom.” It’s all about myself kadtong wa pa ko’y work nga ako pa’y mahibilin sa balay, ako tanan trabaho, bantay bata, laba, luto... Mao ni ang pipila sa 3rd stanza: “Hanging clothes under the sun/ detergent irritates my sensitive hands/ playing toy cars marbles and rubber bands/ `til sign off tv’s and midnight dance...”
Kinsa ma’y naka-influence nimo sa music?
Ang akong brother nga police na karon. Nagsugod kog gitara grade 4 ko. First year high school tig-duyog na ko og simbahan pero gitara pa akong gamit. Scholar sad ko pag-college kay member man ko sa school band. Then nag-bass guitar ko kadtong nagtukar na ko sa mga bar. Then dihang gisulot ang among keybordista, giingnan ko sa among manager nga akoy mopuli. Nibalibad ko kay di jud ko kahibawo apan namugos gyud siya mao nga na-challenge ko. Didto ko nagpatudlo sa laing keybordista sa banda nga siya sad ang ga-manage. First nakong tukar sa keyboard kay “Whats up” 3 ra kabuok chords. More on self-study ra gyud ko sa keyboard.
Dugay na kang keybordista sa Sto. Rosario Parish?
Nag-start ko mga 2007. Dire ra pud ko nakat-on sa mga kanta sa simbahan. Motukar ko from 2 p.m. to 7 p.m. or 7 masses a day except Sunday. Naa sad koy duha ka choir nga gi-handle sa Sto. Rosario Parish. Naa sad mi madawat pero ang fulfillment nga makaalagad ka sa Ginoo di kabayran og sapi. `Di mi adunahan sa materyal pero bahandianon mi sa espiritwal nga kinabuhi.