ADUNA na say laing suspek nga gidakop ang atong kapulisan niadtong Martes, Abril 9, kalabot sa linuog nga pagpatay ni Christine Lee Silawan didto sa Bangkal, Lapu-lapu City, buwan na ang nakalabay.
Pero gawas nga wala una nila ipakita sa media, wala usab nila ibutyag ang pangalan niini ug labaw pang wala mohatag og igong detalyi kon nganong nahimo kini nilang suspek.
Si PRO 7 Director Debold Sinas kagahapon mitug-an sa mga media nga miangkon kuno ang ilang bag-ong suspek kon giunsa nila pagpatay ang 16-anyos nga dalaga.
Didto pa kini madakpi sa mga tinugyanan sa balaod mismo sa ilang balay ug giingon nga padong na unta kini mopaingon sa Bohol kay gustong adto didto motago human nakamatikod nga misibaw ang iyang pangalan sa imbestigasyon.
Sa niaging buwan, pipila ka adlaw human mapalgi ang patayng lawas ni Silawan, usa ka Jonas Bueno nga atoa na nanimuyo sa Davao City, ang ila usab gitumbok nga suspek sa maong krimen. Pero sa dihang wala silay nakuhang ebedensiya, ila na lang kining giingon nga person of interest ug hangtod nasuta nga dili diay mao.
Dili kaha mosangko ra gihapon sa susamang sitwasyon ang mahitabo niining ilang uwahing gidakop?
Gisunod ba usab nila ang legal nga proseso sa pagsikop ninii?
Ato man tuod nga gihangop ang padayon og kaagresibo sa mga kapulisan sa pagpangita sa tinud-anay nga mamumuno ni Silawan, apan dili lang unta nila gamitan og paagi nga mora na lang og namukot og isda nga bisan kinsa na lang ilang signiton aron himuon nga suspek.
Kay gawas nga makapasamot kini og kalubog sa pagsulbad sa kaso, dili usab lalim alang sa mga inosente nga maamong ug mapasanginlan lang sa sala nga wala nila buhata.
Nganong tagi-tagi man ang ilang paghatag sa detalye nga bisan gani pangalan sa suspek dili dayon itug-an?