JAVIER, Leyte - Duna nay person of interest ang kapulisan sa pagpusil patay sa usa ka mananagat niadtong Dominggo sa gabii, Abril 10.
Si Police Capatain Ernie Rocha kinsa nahinabi sa Superbalita Cebu, niingon nga nangita pa sila og lig-on nga mga ebidensya.
Usa ra ka tawo ang gitutokan karon sa kapulisan kinsa natukma sa nakita sa witness.
Matod sa nakakita nga usa ka tawo nga nakamaskara ang nipusil patay kang Norlito Naraja, 50, taga Barangay Binulho ning lungsod.
Dali kining nisakay sa motorsiklo nga dunay puwa ug puti nga color combination nga dali nisibat paingon sa proper.
Gibutangan og placard ang biktima nga may nakabutang nga “huwag tularan, tulak yan! Ikaw na ang susunod” ug dunay usa ka pakete sa gituhoang shabu nga giputos sa papel.
Apan matod ni P/Capt. Rocha, ordinaryo lang nga lumulupyo si Naraja ug wa sa ilang drug watchlist, apan nabilango kini kaniadto og upat ka tuig sa kasong homicide. (JKDP)