Wanted napatay sa pulis

STA. Rita, Samar - Top 2 most wanted person sa Samar napatay sa police operation, alas 2 sa kadlawon, Dominggo, Abril 7,2019.

Giila ang suspek nga si Noel Flores, 33, minyo, taga Barangay Curry, Sta. Rita, Samar.

Ang suspek dunay kasong tulo ka counts sa murder nga walay piyansa; usa ka frustrated murder nga may piyansang P200,000 ug usa ka attempted murder nga may piyansang P120,000.

Ang operasyon gipangulohan sa Criminal Investigation and Detection Group (CIDG) Western Samar Field Unit ni Police Major Norman Ala.

Kauban niini ang mga sakop sa Provincial Intelligence Branch sa Samar Provincial Police Office, Provincial Mobile Force Company ug Regional Special Operations Group (RSOG).

Mag serve lang unta sa warrant of arrest nga giisyu ni Gandara Samar, Regional Trial Court (RTC) Branch 41, Judge Feliciano Aguilar ang mga operatiba apan giingong nisukol si Flores.

Matod sa CIDG, sa dihang padung na nila dakpon si Flores sa pinuy-anan niini, kalit gipamusil ang mga operatiba.

Agi og depensa, nibawos ang mga pulis ug naigo ang suspek. Gani, gidala pa sa Calbayog Hospital si Flores, apan gideklarar nga dead on arrival ni Dr. Rophil Asuero.

Narekober gikan sa suspek ang usa ka unit sa kalibre .45 nga pistola, pito ka mga bala ug usa ka basiyo sa bala. (JKDP)