Pagbantay sa acetylene gang

MGA business establishment sama sa bangko, pawnshop ug uban pa gipahimangnuan sa kapulisan sa dakbayan sa Mandaue nga mopahigayon og security survey inspection sa palibot sa ilang edipisyo.

Kini aron di mabiktima sa acetylene o termite gang, ug uban pa nga mga klase sa mga manglungkabay nga makasulod sa establisemento pinaagi sa pagkutkot sa pipila ka parte sa sulod sa edipisyo.

Matod ni Police Col. Julian Entoma, director sa Mandaue City Police Office, nga di dapat mokompyansa ang mga establisemento ilabi na mga pawnshop ug bangko, ilabi na sa sunod semana nga taastaas ang bakasyon tungod sa Semana Santa.

Ang modus giingon nga nisiaw na usab sa kaulohan.

Nipahinumdom si Entoma niini tungod kay gawasnon pa ang di mominus 20 ka mga sakop sa Kuratong Balelelng o Ozamis robbery group nga giingon nangabot sa Mandaue City niadtong Marso 8.

Tulo kanila ang napatay ug duha ang nasikop atol sa police operation niadtong Abril 5 sa gabii.

Awhag ni Entoma nga mas maayo nga tan-awon sa pangu sa security personnel sa mga bangko ug pawnshop, kon natungod ba sa culvert ang ilang mga edipisyo, ug kon tupad ba sila og mga paabangan nga balay.

Siguruon usab nga operational ang mga security alarm sa sulod aron kon ugaling ig-on sila sa bisan unsa nga klase sa manglungkabay, dali dayon nga makaresponde ang kapulisan.

“Kay ang lisod baya ani nga modus, kay bisan naay gwardiya sa gawas sa establishment, but ang paglungkab, paagi man sa ilawom ba ron o sa kilid. Mao dili gyud dapat mokompyansa,” asoy ni Entoma sa Superbalita Cebu.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph