DUHA na nga sunodsunod regular session sa Sangguniang Panlalawigan (SP) sa Sugbo nga way quorum niadtong Abril 1 ug Abril 8, pulos adlawng Lunes.
Apan sumala ni SP Secretary Pulchra Marie Acevedo, natuman gihapon ang mandato nga gisanong kanila.
"As I’ve said, compliant gihapon ta kay nag-schedule man gihapon ta og session. Naa tay agenda, naa gihapon tay business for the day, nagpa-calendar gihapon sila, meaning some of them still passed proposed resolutions, naa gihapon ang trabaho nila, pending na duha. It so happened wa ma-quorum kay wa ang uban,” pasabot ni Acevedo, kinsa di makaingon nga tungod sa pagpangampanya sa mga bokal ang hinungdan nga kini nag-absent.
Matod niya, ang pag-absent sa mga miyembro sa SP dili ma-penalize kay gitugotan sila nga makapahimus sa ilang leave credits alang sa ilang personal o opisyal nga katuyoan.
“Naa man ang ilang mga absences, either official business or personal leave and they are entitled to kuan man sad, naa man silay ilahang privilege leave or emergency leave, naa man sila ana,” dugang ni Acevedo.
Siya nidugang nga kon magsunodsunod na og absent ang usa ka bokal ug wa kini mag-file og leave sa ilang buhatan o wa sila pahibaw-a, diha na kini manubag ug mapasakaan og dereliction of duty.
Kon gitugot sa balaod ang pag-absent sa usa ka miyembro sa sanggunian, ang Department of Interior and Local Government (DILG) sa Central Visayas way nakitang kalapasan niini.
“What the law prohibits is consecutive absences without justifiable cause. If they fail to muster a quorum owing to the absences which are allowed by law then no problem with that,” pasabot ni DILG 7 information officer Michael Braga.
Siya nidugang nga gikinahanglan ang quorum aron dunay maka-transact og opisyal nga business o mapalabang og resolusyon o ordinansa ang usa ka sanggunian.
Apil sa naka-calendar niadtong Abril 1, ang giduso nga resolution ni Bokal Jose Mari Salvador nga magsagop sa implementing rules and regulations alang ordinansa nga maghatag og libreng mga serbisyo sa mga tambalanan nga ubos sa pagdumala sa Kapitolyo ngadto sa tanang kabos ug indigent nga mga pasyente, accreditaiton sa pipila ka mga civil society organizations.
Niadtong Abril 8, naka-calendar ang duha ka ordinansahon ni Bokal Horacio Franco ang load limit sa mga trak nga magkarga og mga materyales gikan sa quarry operations nga magdala sa mga karsada ubos sa hurisdiksyon sa lalawigan ug ang pagtakda og bayranan sa tanang mga sakyanan nga mag-park sa Larsian ug ubang mahinungdanong resolusyon.