NAG-inventory ang Provincial Tourism Office sa mga destinasyon ug ekipo nga gamiton alang sa adventure ug sports activities sa mga turista nga modagsa sa lalawigan sa Sugbo karong summer.
Matod ni Floreza Alpuerto, officer in charge sa PTO, nga tan-awon nila kon wa ba maapektuhi ang level sa tubig sa maong mga dapit ug ang kaluwas sa mga ekipo nga gigamit sa canyoneering.
Duha sa mga suroyanan nga dugukon sa mga turista nga mahilig sa canyoneering ang Kawasan Falls ug Kanlaob Falls sa mga lungsod sa Badian ug Alegria. Sigon ni Alpuerto karong semanaha mahuman ang inventory nga gisugdan niadtong miaging semana.
Sumala niini nga giuna nila ang mga dapit nga pahigayonan og adventure ug sports activities kay tan-awon nila kon nihinay o niubos ba ang tubig niini labi na niepekto karon ang hinay nga El Niño diin naapektuhan ang pipila ka tinubdan sa tubig sa kalungsuran ug dakbayan nga sakop sa lalawigan.
Siya nidugang nga nihimo usab og assessment ang Provincial Disaster Risk Reduction and Management Office (PDRRMO) sa kadagatan nga dagsaan usab sa mga turista diin gitan-aw ang presensiya sa crown of thorns o dap-ag nga nakaapekto sa mga gasang.
Sa pagdagsa sa mga turista sa mga suroyanan sa Sugbo karong semana santa, nag-awhag si Alpuerto sa mga local government unit nga magbutang og health stations aron dali makatubag kon dunay ma-heat stroke o makuyapan tungod sa tumang kainit sa panahon.
“They will be pro-active in making advisories as well as the tour operators kay sila man gyud number one, naa on top with the tourists,” dugang ni Alpuerto, kinsa mao usab ang acting head sa Cebu Provincial Investments and Promotions Office (Cpipo). Siya nidugang nga gipaabot nila mas modagsa ang mga turista karong summer gumikan kay ganahan kini mangaligo sa dagat ug I tungod sa tumang kainit sa panahon.
Karong Abril 12 ug Abril 15 magtagbo ang PTO ug mga stakeholder sa turismo uban sa Philippine National Police ug Armed Forces of the Philippines sa Waterfront Airport Hotel and Casino sa Mactan ug lungsod sa Oslob aron pangandaman ang seguridad sa gipaabot nga pagdagsa sa mga turista karong summer. (SCG)