NAGTINGKAGOL karon sa detention cell sa Lilo-an Police Station ang usa ka asawa ug ang iyang kabit human sila masakpi sa bana nga ni check-in sud sa usa ka lodge sa Brgy Cotcot, lungsod sa Lilo-an pasado alas 9 sa Martes sa gabii, Abril 9.
Ang asawang si “Linda” (dili tinuod nga ngalan), 46, ug ang kabit niining si “Berto” (di tinuod nga ngalan), 52, giingong gisundan sa bana nga si “Bernie” (di tinuod nga ngalan) gikan sa dakbayan sa Mandaue paingon sa Lilo-an human giingong nagduda sa lihok sa iyang asawa.
Ang asawa, kabit ug ang bana giingong pulos taga dakbayan sa Mandaue.
Giingong si “Linda” ug “Berto” kauban og trabaho isip mga sales agent.
Matod ni Police Major Danilo Colipano, hepe sa Lilo-an Police Station, taudtaod nang nagduda si “Bernie” nga adunay lalake si “Linda” hinungdan nga kanunay niya nga gipanid-an.
Giingong nasakpan na ni “Bernie” kaniadto si “Linda” nga adunay ka text-text apan hugtanong nihimakak nga adunay lalake. Dihang nilakaw kini nianang Abril 9 sa gabii, gisundan kini ni “Bernie” sa pagduda nga magkita ug ang lalake niini.
Tuod man, luwan sa motorsiklo, nasundan ni “Bernie” si “Linda” nga nisakay sa sakyanan ni “Berto” gikan sa dakbayan sa Mandaue paingon sa lungsod sa Lilo-an.
Sa dihang ni-check-in na sa Wow Lodge, daling nipatawag og pulis si “Bernie” aron ipadakop ang asawa ug kabit.
Pag-abot sa mga pulis sa lodge uban si “Bernie”, giingong nigawas si “Berto” samtang anaa pa sa sulod si “Linda” hinungdan nga dali silang gipusasan sa kapulisan.
Wa magsukmagay sila si “Bernie” ug “Berto” nunot sa hitabo gumikan kay dali silang napugngan sa kapulisan.
Dali silang gidala sa police station aron adto na mahusay.
Giklaro ni Colipano nga wa hinuon maaktohi sila si “Linda” ug “Berto” nga naghilawas sa lodge pag-abot sa kapulisan.
Si “Berto” giingong minyo, apan wala na usab silay maayong relasyon niini.
Samtang si “Bernie” ug “Linda” adunay duha ka mga anak.
“Base sa atong imbestigador, niangkon ni silang duha (asawa ug kabit) nga nagkuyog gyud sila sa kwarto pero wala jud moangkon nga naay nahitabo nila,” matod ni Colipano.
Kasong adultery ang gikatakdang atubangon nila ni “Linda ug “Berto” gumikan kay desidido si “Bernie” sa pagkiha.
Wa hinuoy laing record sa Lilo-an Police Station si “Linda” ug “Berto” apan gikatakdang makig-alayon si Colipano sa ubang police station aron masusi kon wa pa ba kini mga pending nga kaso.