SA KATAPUSANG home game sa iyang mabungahong karera, gipagawas ni Dirk Nowitzki ang iyang katapusang hunat sa pagmugna niya’g season-high nga 30 puntos sa kadaugan sa host Dallas Mavericks batok sa Phoenix Suns, 120-109, kagahapon sa National Basketball Association (NBA).
Human sa duwa, ang 40 anyos nga German mianunsyo nga moretiro na siya inig ka human ning maong season.
Ang 7-footer nga magduduwa, kinsa misulod sa liga niadtong 1999, nakamugna dayon og 10 puntos sa sayong bahin ug nakadugang pa kini og siyam ka puntos aron hatagan ang Mavericks 68-38 nga labaw sa halftime.
Si Nowitzki nakahilak sa tungatunga sa korte sa dihang paingon nang mosugod ang 2nd quarter.
“As you guys might expect, this is my last home game,” matod ni Nowitzki human sa tribute video alang kaniya.
“This is obviously super, super emotional. Just too many people to really thank. I put you guys on a helluva ride with a lot of ups and downs, and you guys always stuck with me and supported me, so I appreciate it.”
Gilauman nga adunay tribute nga ipahigayon atol sa katapusang tahas sa Mavericks ning maong season nga ipahigayon sa korte sa San Antonio Spurs karong adlawa.
Matod ni Maverick coach Rick Carlisle nga laraw nga paduwaon gihapon nila si Nowitzki, kinsa mikulit og record nga 21 ka tuig sa NBA nga usa lang ka franchise ang giduwaan.
Si Kobe Bryant, kinsa miretiro sa niaging tuig, nakaduwa og 20 ka season sa NBA nga ubos lang sa Los Angeles Lakers.
Gipasabot ni Nowitzki nga wala niya ibutyag ang iyang plano nga pagretiro gumikan kay dili siya gusto og farewell tour.
Giangkon sa 14-time All-Star nga gibuhat niya ang iyang tanang makaya ning duwaa aron paghatag og saktong lingaw sa iyang mga sumosunod sa katapusan niyang duwa sa balwarte sa Mavericks.
Sa postgame video, nahibulong si Nowitzki nganong gipakita ang iyang kaugalingon nga naghisgot sa mga magduduwa nga iyang gipang-idolo.
Dayon misulod sa korte ang iyang mga gipanghisgutan nga sila si Charles Barkley, Larry Bird, Scottie Pippen. Shawn Kemp ug iyang kababayan nga si Detlef Schrempf.
“The only guy that was missing was MJ,” matod ni Nowitzki, kinsa nagtumbok kang Michael Jordan. “That was my No. 1. They brought Larry Legend. I mean, it’s, that was an emotional moment when I saw all five of them and I was in shock really.” (AP, ESL)